搞咗咁耐，早兩日終於入住咗馬鞍山，兩公婆各自住老家廿二日之後，又再度共處一室，正式結束 Freeman 的日子…

 

自己好鍾意馬鞍山沿海嘅風景同空氣，今日中午衝去跑步，跑呀跑心情不知幾舒暢，一直跑到馬場對面，跑到喘晒氣彎晒腰，擰轉頭先知錯，因為回頭路咁長，返到屋企已經死咗大半啦！

 

除此之外，日落時一樣醉人，幾次飲可樂睇日落，但太陽老爺趕住收工，眨眼消收於群山後面，罐可樂都未飲完已經天黑，只能亨句…

 

夕陽無限好，卻是近黃昏！

 

不知望穿幾多樽秋水，苦等兩個幾月，今日下晝終於攞到架新車啦！

 

地點約好喺公司，架車一嚟到，幾個同事衝出嚟幫手，左睇右睇，驗屍咁驗，情況有啲似結婚接新娘，不過就唔洗我食榴槤…

 

經過一輪交鋒，大半個鐘頭後正式移交車匙，我急不及待，跳上司機位，踩吓油門印吓迫力，呢度摸吓嗰度又搞吓，不奕樂乎。

 

之後時間當然踴躍揸車，但新車落地份外緊張，惟有慢慢揸順便 run-in …

葉問之後，決定睇埋「拳霸2」，比較又好，切磋又好，總之動作片就差極有個譜，入場先算…

 

買得飛睇 Tony 渣，就預咗唔理劇情懶理造型，最緊要拳拳到肉腳腳七注吓吓爆缸，總之好似第一集咁，睇到我熱血沸騰手心霧汗就得啦…

 

誰不知，呢套所謂嘅 「拳霸2」，所謂嘅 Tony 渣自編自導自演，所謂嘅籌備 3 年瀝血之作，所謂嘅泰國超賣座動作片…

 

嚟個 180 度大轉變！

 

主角變成森山大野人，幕幕喺泥漿度滾嚟滾去，個髮型又衰過乞兒，都算！個世界觀又無厘頭超濃縮，泰國人+緬甸人+鬼佬+中國人+黑鬼、又有盲俠又有忍者又有半獸人又有奴隸…都算！最頂癮阿渣哥今次唔用拳腳，變成兵器之王，刀呀劍呀槍呀棍呀鞭呀火藥呀樣樣出齊，美中不足就係無摺凳同玻璃樽…

 

你話嘔泡唔嘔泡…

 

未算！打打吓臨尾急急收韁，旁白無啦啦講：「主角看似九死一生，但如果我哋一齊用念力，或者幫到佢呢…？-End-」

 

唔係嘛！仲有下集，啲伏線咁直接，真係估佢唔到呀！

 

呢個時候，戲院着燈，散場，我卻呆呆滯滯，嘔完再暈，重重被 KO 。

踏入 09 已經第二日，循例都要回顧一吓舊年，諗番先發覺感恩處處，充滿驚喜…

 

1. 兩公婆喪去旅行，台北台南星加坡北海道澳門廈門…好幾次仲係同好朋友一齊去玩，過中開心非三言兩語講得晒，所以 09 如果我哋仲行得走得，一定要周遊列國，繼續出境！

 

2. 8 月 12 號考完最後一科，正式告別 5 年苦讀歲月，嗰晚全然釋放，狠脫苦海嘅感覺至今難忘，雖然獲益良多，都要講句…「書到用時方恨少，趁嫩快讀命長久」

 

3. 住咗差唔多兩年，12 月終於搬離「金輝」，告別婚後第一居，但依然懷念大圍食市林立，四圍宵夜唔洗愁。

 

4. 公司執笠唔成， 08 年中仲回光反照，做過半死，希望好天斬埋落雨柴，捱得過 09 呢個冰河時期啦！

 

5. 婚後同兩邊家人相處不斷進步中，尤其我對老婆屋企人，估都估唔到，全靠小朋友幫忙…

 

快樂又開心嘅一年，盼望 09 更精彩。Cheers!!!!