一個我好喜歡嘅雕刻做型師，有個人風格之餘，對動物形態掌握高超嘅技巧，喺日本係個好出名嘅製作人，因此有部份作品轉為擺設玩具，喺香港以套裝玩具大熱賣。

 

我對‘俊男’嘅作品可謂一見鍾情，尤其某啲古零精怪嘅做型，真係睇到我會心微笑…

 

 

可惜呢啲咁頂引嘅擺設只作日本內銷，好可惜呀！

 

 

今日放假，中午落街食雲吞麵，食食吓對面坐底兩個學生哥，一個身形特別細粒…

 

細粒學生起初叫碗牛腩麵，唸唸吓轉叫淨麵，之後同朋友講：「淨麵平啲呀，一碗牛腩麵可以食到兩碗淨麵啦。」

 

嗰刻我好有共鳴，仲唸番自己細個嘅片段…

 

求學時期自己一樣又矮又瘦，但就好大食，零用錢唔多，所以好多時都要食淨麵，感覺正正就係平啲飽肚啲…

 

有時仲會加腩汁，因為腩汁隨時夾雜啲啲腩肉碎，有時仲有舊牛筋添，真係隨時帶來驚喜！

 

…唸唸吓，兩個學生哥埋單，我心裡祝福細粒學生：「加油！大個要食有餸麵呀！」

 

望番自己，牛腩麵、雲吞麵、油菜加多支可樂！

 

大食依然。

好友阿強阿妹起行去台灣玩幾日，出師有名，就係一週年紀念…

 

一年前我哋兩對準新人一齊去台灣影結婚相，辦正經事之餘又可以玩番幾日，時刻都大叫「食晒佢、買晒佢」！開心程度不能言喻，總之就係樂而忘返。

 

更重要嘅係，呢個‘斌多士’都係去完台灣之後先誕生，多謝阿強，讓我哋耐唔耐喺度吹吹水，寫呢樣寫嗰樣…

 

斬眼一年，我都好想有機會一班朋友一齊出遊，玩過痛快…

 

無論如何，祝你哋一路順風，心情輕鬆，搏命玩番幾日，叉爆電先返嚟…

 

 

一年前嘅快樂片段…

…兩名男子被巨象襲擊！！

 

 

 

幾年前死亡筆記上映時，仲以為係一套鬼片，所以無興趣去睇。但最近同阿斌睇過死亡筆記嘅卡通片之後，就十分喜歡呢個故事。當中嘅兩位男主角︰L 同夜神月，起初覺得夜神月靚仔啲，而 L 個樣就怪怪又唔靚仔，不過對眼袋就好似斌仔喇！之後，見到以下呢個玩具造型，就改觀之餘仲有點喜愛 L 。

今日睇到新聞紙，知道有香港發明家楊威美國，新發明「椅子防摔倒裝置」有效防止椅子向後反，咁啲小朋友就無咁容易玩到反凳，撞親後腦。

 

呢期身邊好多小朋友出世嘅出世，成長嘅成長，呢個新發明應該幫到啲父母，防止意外發生！

 

除此之外，新發明仲有「防門夾手」、「電磁波阻隔裝置」、「一種組合串燒爐」、「出外前留言提示器」…

 

小改變，大改善，希望發明家繼續努力，做福人群。

 

ps. 不過，論到最震撼嘅發明，相信一定係「大陽能電筒」，發明家係：達聞西！

連續兩場睇利勿浦都興合合咁息電視，因為實在打得太差，上揚輸一球比馬賽，今次對熱刺，追得番二比二算執身彩…

 

什麼聯賽冠軍熱門，什麼王子復興紅軍皇潮…

 

醒吓啦，無必勝嘅決心、無一人走多步、無辦法入到第二球、無隊型、老鼠拉龜無晒符…依家仲有好多不足呀！

 

狂攻車仔，狂數打比郡又有咩用呢？聯賽三十八場波，全季打得一兩場好波最後只有祝賀人哋高舉獎杯…

 

好好反省吧，作為利記嘅廿年粉絲，實在好希望有日見證紅軍重奪聯賽冠軍。

 

只是，條路仲係好長啊！