公司生意漸漸走出谷底，執笠唔成，仲越嚟越忙，於是決定請人，一請就幾個，全部有經驗有青春，一表人材。

 

當中有個新同事好突出，全因為見識廣博，所以凡事例俾意見例必搭咀…

 

於是乎，你教佢貨櫃碼頭小知識，佢聽兩聽，回應番你成個貨運業嘅歷史與走勢；

 

你教佢系統上點運作，佢會同你數番十個要改進嘅地方，呢度要咁嗰度應該咁；

 

你同人傾吓神七升空，佢會搭咀整個中國嘅航天發展，仲加插一段中美俄軍事競賽分析；

 

你係咁依講吓娛樂圈八卦嘢，佢又搭咀勁爆鮮為人知嘅秘密，隨時列出當中人物關系圖…

 

總之就上至天文下至山墳，無一不精無一不醒…

 

我卻感到心煩，每次佢又搭咀亂吹水，我就火嚟，心裡狠狠地祝福佢…

 

一味吹水，不如去做區議員啦！

尋晚臨瞓時段，老婆忽然喺書房驚叫，猛嗌我快快埋去睇吓，我仲以為又有大曱甴大甲蟲大飛蛾…

 

點知衝去書房見老婆指住牆邊，我低頭一睇…

 

依！有無搞錯，竟然喺牆腳木罅之間，生長咗一隻大蘑菇，感覺好怪異…

 

一來位置喺老婆書枱旁邊，二來粒菇長到咁大粒，照計呢度成日有凳車嚟車去，無理由生咗一段時間都無人發覺！

 

…真係奇怪。

  家生蘑菇…

 

…生活貧苦

努力行萬里路，十月三號至七號，四條友衝去台南玩番五日，時間唔長，但渡假心情滿瀉，所以一樣盡興，爆肚而歸。

 

由香港先飛高雄，又玩又食三日兩夜，第四日由高雄坐高鐵直搗台北，玩到第二日天黑先離開，零晨時份先返到香港，仲唔係玩到盡一盡！？

 

特別紀念趣事幾單：

 

1. 兩粒瓜子咁大嘅飛滋生喺咀左下角，全個旅程一直烈焰地盛放，叫我痛不欲生，變相令我嘅吞吐量減咗一半，大部份時間有得睇無得隊，好慘！

 

2. 旅遊新熱點「墾丁」令人陶醉，陽光海灘曬到無倫，水清沙幼更加係水上活動嘅天堂，成笪地方啲人都係渡緊假，淨係諗住玩，十足亞洲夏娃兒，有機會一定要去多次！

 

3. 繼星加波之旅忽然愛上加央多之後，今次無啦啦愛上鳳梨酥，當中尤以牌子「舊振南」最為出色，令我失控令我不痛，試食時一口氣連隊四個，正！（最緊要免費）

 

4. 難忘美食仲包括：（高雄）南豐魯肉飯、老李排骨湯麵、牛老二牛肉麵（必試辣菜圃）、旗津鴨角海鮮嘅炸墨魚丸、（墾丁）‘沙哇帝卡’嘅炸蝦餅、（台北）黑橋牌辣肉腸、舊振南鳳梨酥、地道珍珠奶茶…

 

旅行時間過得特別快，貶眼五日，當中玩得開心又飽肚，叉足電回港又要拚搏，順便度度下次去邊好呢？

 

 墾丁的海…

台灣最南的塔…

 

細個時踢波爬山游水釣魚執圾垃，好多時都係一群街童一齊玩，當中有個朋友，智力有啲問題，花名“傻仔”。

 

大家雖然受埋傻仔玩，但見佢好蝦唔識反抗，當然成日恰佢…

 

於是玩馬騮搶球例屈佢做馬騮，射波子就搶佢啲波子，打貼紙就呃佢啲貼紙，踢波時個波射咗落山，唔洗問，一定老點佢落山執波…

 

如是者，大家習以為常，各有開心，佢有朋友一齊玩，我哋又有整蠱對象，總之就嘻嘻哈哈過日子…

 

一日，傻仔獨自喺青衣碼頭邊捉蝦，一時失足被浪卷咗落海，救番上岸嘅時候已經無晒知覺，就咁浸死咗…

 

件事登晒報紙，震驚每個街童嘅心靈，大家平時好事多磨，心虛之下自然震過貓王，個個都驚傻仔返嚟報仇。

 

於是好一段日子，夜晚無人夠膽落街玩，個個乖乖留喺屋企，但謠言怪事一樣傳得熱烘烘…

 

一時又傳傻仔半夜喺走廊飄嚟飄去；一時又話佢有家歸不得，企喺對面望住自己屋企；一時又話回魂夜要揾我哋是但一個陪葬…

 

總之就驚嚇滿分，夜晚唔敢息燈！

 

成日話平生不作虧心事，當時個個又驚又後悔，如果半夜真係有人敲門…你都咪話唔驚！！

今晚上學校網頁睇睇，原來考試成績老早公報咗，我由下而上慢慢甩，2003，2004，2005…2008

 

望到結果，我呆咗一陣，心跳急升，手心冒汗，瞳孔放大，嘴唇震吓震吓…久久未能相信，