好多朋友都知我總有薄荷糖 Eclipse 喺身，由佢初賣 $9.9 開始食到依家賣 $15，由深藍色到淺藍色，由綠色到肉桂味嘅紅色，真係糖不離口。

 

咁到唔止，食完我仲會儲起個鋁罐仔，放喺公司某個櫃桶，放吓一個，放吓又一個，卒之早幾日爆滿…

 

決定開倉…

 

 唔覺唔覺，儲滿成格櫃桶…

 點點數先…

 有成 122 個罐，每個裝 50 粒，即係話我都食咗幾千粒！

 

上星期六去咗教會青少年團契，分享讀書嘅感受，題目係「書到用時方恨少」，對象係一班青少年人，由中一到中七…

 

除咗我，另外仲有一個嘉賓（拜仁）同時分享，我哋一個正面一個負面，我固然就係嗰種細個唔讀書，大個先知衰，中年發力，臨老入書叢…

 

拜仁就剛剛相反，由細到大勁叻讀書，會考三十分（係我嘅十倍！），喺港大讀精算，依家有條件揀工做…

 

雖然各走極端，但我哋對讀書嘅睇法都係一樣，少年時候要讀好書，考好個會考，有機會當然讀埋大學，免得將來後悔莫及…

 

分享過程有講有笑，一群年青人鍾意問吓問題攪吓笑，輕鬆得自覺後生十年…

 

最後以「有書趁嫩讀」作結束，希望對年青人有點點反思，努力未算遲。

 

無咩興趣追近期嘅電視劇，剛巧好友借來經典「蓋世豪俠」，決定同老婆齊齊煲佢一煲…

 

依家重溫，「坐底飲杯茶食個飽…」呢句對白出自未成名星爺真係零舍過癮，仲有吳鎮宇、藍潔英、羅慧娟同吳孟達，真係好戲不妨一睇再睇呀。

 

之後數晚兩條友又要坐定定啦…

 

尋晚教會青少年團契搞咗個 Holy Party ，老婆有份參與，仲誠邀阿媽出手，煮幾個拿手糕點，炸啲印尼蝦片，仲有滷水雞翼…

 

派對後，好多弟兄姊妹大讚阿媽手勢無得頂，樣樣都好食，尤其嗰啲椰汁糕同西米糕…

 

大家對我講：「你就好啦，成日有得食咁正嘅糕點…」

 

實情係，所有糕點喺我屋企都沒有出路，我同細佬每次都唔食，阿媽整親都係派街坊。

 

講你知，最利害嘅內銷餸菜其實係：印尼沙律（印尼話~加多加多）、炸菜蒸肉餅、冬菇燜海參、蕃茄蛋、燜豬手、豉油蛋、炒辣椒、椰汁菜、炒米粉、酸沙葛…

 

每次都令我哋食慾大振，無三四碗飯都停唔到口。

 

有機會上我屋企食飯，阿媽定必落足心機落足料、煮到九餸一湯仲有甜品，那怕得六個人食…