聖地旅行團今日圓滿結束。

 

晚上七點半準時喺機場接到老婆，亦有緣目睹其他團友出閘，個個大喼細喼凱旋而歸，氣勢磅礡，浸過死（海）水返嚟係唔同啲！

 

無論如何，感恩你哋平安返嚟，趕得切倒數，送七迎八。

 

新年快樂！

頭先無線節目「事必關己」講高清電視，於是睇吓順便學吓嘢，真係唔睇由自可…

 

短短幾分鐘嘅講解，竟然講咗廿幾三十次「高清」兩個字，什麼高清電視機、高清錄影機、高清節目、高清攝錄機、高清影碟、高清電腦、高清遊戲機、高清機頂盒、高清線…

 

嘩！有無搞錯，煩唔煩架！

 

咪比我估中，08 年必買仲有高清相機、高清電話、高清手錶、高清太陽超、高清月歷、高清化妝鏡、高清魚缸、高清鬧鐘、高清相架、高清漫畫、高清書枱燈、高清字典、高清唇膏…

 

夠薑就幫個仔改名「高清」，英文名 HD ，終身編號 1080p ！

聖地團仲有四日就回歸，喺度 update 吓佢哋多日以嚟嘅行程。

 

12/18  香港去曼谷轉機 約旦 （行李遣留曼谷）

12/19  約旦 （攞番行李）

12/20  去皮特拉睇七大奇境之一 （聖戰奇兵外境地點），再到 安曼

12/21  去以色列 - 加利利湖

12/22  喺以色列嘅效外野餐  （做冬，之後睇日落）

12/23  晚上出發往伯利恆

12/24  到耶路撒冷過平安夜

12/25  去大衛城  （藍天白雲）

12/26  離開耶城，往死海暢泳曬大陽

12/27  離開別士巴，夜上西乃山睇日出

12/28  去埃及…

 

豐富嘅旅程仲有幾日咋，玩得開心啲，為你哋祈禱！

動畫版終於去到最後一集啦，嚟緊星期六晚，翡翠台 00:15 - 01:40 。

 

同漫畫有啲唔同，動畫營造氣氛好啲，又會有啲交代有啲回憶，重頭戲 L 死嗰集就令我印象深刻。

 

再講，就算我睇晒全套漫畫，其實都唔係好明點解最後 N 可以大破夜神月，所以動畫版大結局一定要追！

 

仲要記得錄比老婆睇，唔係殺頭都有之！

 

今晚夜闖「西田」買禮物，搭電梯時，後面一對情侶忽然嘈起交上嚟…

 

男人好燥咁鬧：「…你慚唔慚愧架，買咁多嘢…？」（相信已經被折磨咗一日）

 

女人大聲頂咀：「…你慚唔慚愧架，啲嘢全部都唔係你俾錢…」（相信已經屈住成肚氣）

 

男人窒一窒：「我真係頂你唔順…」女人即時回應：「我仲頂你唔順呀…」

 

我不期然行前一級，因為感到背脊有股熱氣，好似有嘢想爆炸。

 

情侶最後無以手代口，大打出手，我卻暗暗祝福呢位男士，惟一嘅出路，相信係買間百貨公司俾女友。

呢幾日耐唔耐收到老婆遙遠的 SMS ，報導吓佢哋啲花絮…

 

第一晚搭飛機由香港去曼谷，再轉機去約旦，點知到咗約旦先發現全團人嘅行李漏咗喺曼谷，要第二日先有得攞，第一晚無得沖涼。

 

廿二號全團人一齊做冬，藍天白雲下食生果蔬菜，悠然自得。

 

令人羨慕嘅旅程，我卻望住大埔道發呆，左手可樂右手蝦條，一個人做冬！

有朋自遠方來，好友‘伴郎拍直’為怕我悶怕我自閉，專登嚟大圍陪我飲嘢吹水，狂歡一晚，傾計傾到兩點先送佢走…

 

辛苦兄弟陪伴，放心，老婆外遊，我不至於屈悶到失常，唔洗擔心！

今日收工揸車送老婆去機場，沿途上佢好關心咁叮囑：「嗱！想我去得放心，你呢段日子就唔好飲可樂、食薯片、蝦條、公仔麵、辣椒、粉果…」

 

我話：「真係咁嘅話，你會去得放心，三日後我就去得安樂！」立刻換來兜鎚窩面…

 

抵達機場後，六點半集合，八點零鐘浩浩蕩蕩入閘，正式開始十幾日‘聖地之旅’，眼見一大班弟兄姊妹咁興奮出發，真係羨慕死我啦！

 

祝你哋一路順風，好好享受呢個特別嘅旅程，過番個特別嘅聖誕節！

嚟緊十二月十八日至十二月三十一日係一段大日子！

 

因為老婆會參加聖地旅行團，前往以色列、埃及與約旦，親身體驗幾千年前神所到過嘅地方，讓所認識嘅歷史地方變得更生動更立體，聖地之旅實在係一份最特別嘅聖誕禮物。

 

今晚見太太開始執拾行李，感覺日子近了，望望月歷，原來佢後晚就要出發，一去兩星期，同一時間代表我有兩星期回復單身寡佬，自己照顧自己，我有我天地！

 

磨拳擦掌日思夜想，要衝出街玩過痛快，一隻馬騮甩咗條繩喎，仲有影咩！

 

實情卻係，呢兩個禮拜要頂同事放大假，聖誕假期都要返工，十二月尾要做起一份功課，下個月仲有兩份嚟緊…

 

嗚嗚嗚…無咗條繩嘅馬騮，對腳仲有個大鏈球！

當時剛剛憑「父子」攞咗影帝嘅郭富城拍呢套「C+偵探」，睇得出佢好有信心亦落足心機演，好有野心想蟬聯影帝，可惜最後撞正「色戒」朝偉，無野好講！

 

故事講述私家偵探郭富城受人所托，要追查看似簡單嘅尋人案，過程中當佢發現越多，事件原來越復雜，唔肯放棄加上佢嘅聰明，最後破咗案，仲有意想不到嘅收獲…

 

睇完套戲有幾處得意發現：

 

1. 主角成日攞部 N95 出嚟影相，左影右影，大賣廣告，真正要嚟講電話得兩次！

2. 綠葉王廖啟智演得好自然，有點爐火純青嘅境界，無得頂！

3. 片頭首泰文歌好正，可惜唔知歌名…

 

最後，欣賞主角嗰種唔放棄嘅態度，那怕困難重重，憑住堅持與忍耐，到最後竟然得着意想不到嘅收獲…

 

共鳴不大，只是因為從來無幾件事自己可以堅持到最後…

 

利勿浦生死戰贏馬賽 4:0 ，終算完成任務，最後三場全勝，出線歐聯十六強，唔好理抽籤後係咪死亡之組，起碼保住嗰二千萬磅收入之餘，什麼炒領隊換領隊都暫時唔會發生住！

 

講波佬阿桂哥又有妙語，當馬賽輸到 3:0 嘅時候，佢話：「依家馬賽得番兩個希望可以贏番，就係‘絕望’同埋‘無’！」

 

真係啤一聲！

 

無論如何，利記依家可以專心應付週日主場大戰曼聯，雙紅會呀！

既係好朋友又係同學嘅黑鬼文今日行畢業禮，我有幸被邀請當然要捧場啦！

 

今年係開大（OU）第十六屆畢業典禮，全部畢業生成四千人，商業管理都佔三分一…

 

當典禮正式開始，全場應屆畢業生企晒起身，逐個逐個排隊上台等叫名，由左邊行到中間點吓頭，再由右邊落台行番埋位，台上全程十秒都無，真係快過打針！

 

我卻發白日夢，幻想台上大叫：「陳大文，多謝十萬蚊學費，陳小明，多謝十萬蚊學費…」最後校長嚟個演講結束：「多謝你哋嘅上進，你增值時我又增值，全部學費夾夾埋埋，總數，一憶…！！！！」

 

無論如何，沙紙一張值千金，因為當中未計嘅仲有時間同精神，所以，見到朋友你多年嚟都咁堅持，挨到畢業，還是衷心戥你高興！

 

繼續努力，學海無崖呀，兄弟！

 

餓咗劉青雲啲戲好耐，今期「神探」上畫，加上杜琪峯 + 韋家輝，吸引力大增，所以今晚決定入場欣賞。

 

 

 

 

阿媽！我得咗啦！

 

「扭計骰」扭咗十幾日，衰咗無數咁多次，今晚終於俾我扭到，回復原貌六面同色！

 

興奮心情不能言喻，童年嘅遺憾終於得到解脫，原來要還原粒「扭計骰」並唔係夢想，只要你肯堅持，世上邊有難事！

 

特別多謝公司裡一位絕世高人，呢段日子耐心教導，詳細說明，不斷鼓勵，我相信，你當年一定有上電視表演，因為我發現粒骰响你手中，完全無晒自我，三兩下就還原…

 

望住粒「扭計骰」，我自信返晒嚟，好！今晚飲可樂慶祝！

 

今日睇咗套「出埃及記」，吸引之處除咗有任達華之外，當然因為個戲名，令我好想知道與認識嘅「出埃及記」有咩關系，點解要用呢個做戲名…

 

故事摘要：

 

 

睇完覺得個戲名用得有點莫名奇妙，好似風馬牛不相干…

 

不過，記得任達華有句重點嘅對白，佢話：「當一啲好荒謬嘅事去到某啲程度，就會全世界都唔信，但唔代表件事無發生過…」

 

令我唸起聖經裡面「出埃及記」所描述嘅種種神跡。

 

今日睇咗套舊戲，由林嘉欣及舒淇主演嘅「怪物」。

 

出乎意料地覺得幾好睇，雖然電影開初某啲場面有點鬼影朧朧，有啲驚嚇，但絕唔係講鬼靠嚇，而係描述兩個媽媽點樣搏命揾仔，林嘉欣又有突破，除咗個樣要扮怪物之外，面對家庭劇變，搞到精神失常不能自拔，睇完都覺得佢真係幾慘！

 

至於舒淇呢…或者佢練好啲廣東話會好啲！

 

好朋友，早陣子同你食飯吹水，知道你正身處十分辛苦嘅困境，婚姻唔如意又要凑住個仔，每日幾個鐘車程返放工，無時間陪個仔，阿媽對眼又有事，自己身體又出現毛病，唔得閒睇醫生…

 

好似頭頭碰着黑，日日都有損失…

 

聽到之後一時間都唔知點講，但你要唸深一層，依家個仔健康又黐你，份工雖然路程遠，但人工都唔錯噃…所以千其唔好唸埋一邊，好運同黑仔嘅日子都有盡時，努力又樂觀咁過今日先對得住自己同屋企人架嘛！

 

以前咁辛苦要捱更底夜你都無有怕，今日少少逆境一定難你唔到嘅！

 

老友，撐你架！