呢段時間成日經過金輝附近，我都會望多兩眼懷緬一番，話晒都係我哋嘅結婚第一居…

 

我會記得，當初未入伙之時，一班老友記幫手打掃，又刷又抹仲省埋厠所，無你哋出手，間屋點會咁四正。

 

之後常常有朋自遠方來，飲嘢食嘢煮嘢，我會記得嗰把生果刀，個個用親都切到手，頻頻灑血為佢開光…

  

記憶當然包括樓下嘅滷味鋪，生果檔嗰啲又乾又酸嘅橙，對面太興嘅餐蛋丁，前面 OK 免費睇雜誌…

 

經過時抬頭望吓間屋，唔知新租客住得慣唔慣呢？

 

唔知……

 

啲“菇”有得收成未呢？

 

至為痛苦嘅 7 日，每晚都 pack 到零晨一兩點，pack 極都有，四圍都係雜物，我以為已經賣咗好多玩具，點知竟然發掘到一箱又一箱嘅玩具，扭蛋超合金車仔…對住佢哋 pack 又唔係掉又唔係，好鬼厭煩，往後安定落嚟一定要再開倉，賣賣賣…

 

對住雜物圍困嘅時候，我哋不時吼叫：「呢個要唔要呀？」「呢個掉唔掉呀？」

 

有時攞住啲物件，真係只有滴汗，加個無奈的笑容…

 

 

請咗搬屋公司，過程讓我目瞪口呆，16 個紙皮箱 7 個紅白藍 2 個大膠箱 2 箱紅酒，仲有床褥酸枝凳書枱茶几風扇 CD 架摺凳…

 

前後半個鐘，全部要搬嘅都上晒車，唔洗個半鐘拍拍手搞掂晒，幾舊水真係抵到爛。

 

想象吓如果由我親自出手，搬完之後應該要即時送院，插住喉倒數迎新年都似！

 

 

因為新屋未住得，我哋決定分開吓，各自返老家暫住，老實講，呢吓實在無得頂呀！

 

我再無須浪衫洗衫，食完飯拍拍籮柚睇電視，連起身都唔洗摺被，晚晚有湯飲，秒秒有嘢食…哈哈，全因屋企有個好媽媽，呢十幾日好似渡假一樣。

 

另一邊廂，同老婆小別一吓，回到未嫁時，去街有接有送，感受好 fresh ！

今晚同老婆衝去睇葉問，知道好多朋友聖誕假期睇，所以咪講劇情，但我自己覺得，真係好睇。

 

兩句形容觀後感…

 

葉問發火，非同小可。

 

香港公開大學，第十七屆畢業典禮，喺灣仔伊館舉行。

 

我第三個上台，老婆攞得相機出嚟，我已經行緊落台，吹漲。

 

典禮過程實在悶透，除咗釣魚，我都會留意吓人哋啲名，將來或者可作參考…

 

場中有時都有起哄，例如有兩個同學個名都叫…李嘉欣…

 

無論如何，臨老入書叢，完成五年‘開大’課程，今日正式帶起四方帽，眼懞咀唇震，心中吶喊：阿媽，我得咗啦！

 

 呢…釣緊魚嗰個咩我囉！

早幾日做咗個肝檢查，今日見醫生聽報告，結果毫無驚喜，全部正常…

 

身為乙肝（乙型肝炎）持有人，醫生特別叮囑一啲要注意嘅生活細節，例如多休息多運運，少煙少酒，當中傾得最耐莫過於飲唔飲得酒…

 

據醫生講，如果以 5% 酒精為一個單位（即大概一罐啤酒），一個男人一星期飲唔超過廿一個單位嘅酒精，都唔會傷到個肝…

 

當然，廿一單位酒精唔可以一次過用晒，一星期亦一定要有起碼兩日俾個肝休息，簡言之，如果喜慶場合飲唔多過三四罐啤酒，都唔洗太擔心。

 

其他例湯檢查…身體有啲重，血壓有啲高，又要做運動啦！

 

另外，眼袋有啲深，頭髮有啲白，腰有啲粗，下巴時有時無…

 

醫生都無辦法！

輯錄自（蘋果副刊，小塊文章，李怡）

 

…講一年前的職求人，與一年後裁員潮的對比

 

（—年前）

老闆：萬分歡迎，沒有你我們公司肯定大不一樣！

老闆：我不會讓這樣的事情發生。

老闆：當然！

老闆：不可能，誰告訴你的？

老闆：還用說嗎？絕對比同行還高。

老闆：不會！你怎麼會有這種念頭？

老闆：這是我們的明文規定！

老闆：看情況吧！

老闆：一向如此。

老闆：怎麼可能，你上頭還有許多資深同事。

老闆：毫無疑問，這是我們公司賴以生存的機制。

 

一年後是怎樣情況？請從後面一句句倒着前讀。