為咗應付考試，足足閉關成個月，尋晚一考完試，仲唔係刑滿出獄咩！個心已經不停盤算點樣用盡呢段時間，誓要一秒都唔浪費！

 

今晚一放工，即刻同老婆衝去荃灣行吓街拍吓拖，四圍食嘢四圍買嘢，爽夾正！

 

晚餐去咗「翠華茶餐廳」，試吓「瑞士雞翼」、「上湯豆苗」同「奶油脆皮豬」…

 

不得不讚，個「奶油脆皮豬」真係好好味，令人一試難忘！

 

佢嘅真身其實係，熱辣辣牛油煉奶脆皮薄身豬仔飽…講講吓又想食！？

因為打機，公司春茗未開席已經周身汗散散哋，心情仲因為輸咗有啲失落，埋到位睇吓張抽獎獎品名單，依，五十份將品都有七八成係好嘢噃，遊戲機、電話、家電…

 

無理由十幾年都食白果架嘛，於是嚟個深呼吸，握實拳頭岳高個頭，「嚟啦，遊戲機、電話、家電…求其俾份我得啦！」

 

開席之後先嚟個抽枱獎遊戲，我哋張十二人枱得九個麻甩佬，變相中獎機會大咗，宣布第二枱獎嘅時候終於有我份啦，雖然只係紅酒一支，卻係我第一份春茗不勞而獲嘅獎品，好嘅開始！

 

呢個時候嘅我不其然信心大增，神情古怪，咀角露出異常貪心嘅微笑，口中念念有詞「遊戲機、電話、家電…你哋走唔甩嘅！」

 

之後食吓玩吓又抽吓獎，眨吓眼已經抽咗三份二，我哋個枱仲係死故故水靜河飛，只有拍掌祝賀人哋出去攞吓一份，攞吓又一份，眼見得番十零份獎品，電話響起，原來老婆從另一枱發個短訊問我有無抽到枱獎，我第一時間回覆「努力呀！」，世事就係咁橋，就喺呢一刻，司儀終於宣布…

 

「DORCAS！中獎禮物係數碼相機一部！」

 

耶！我當然拍手拍得特別大力，心唸「夫婦同心，機會大增！嘿嘿！遊戲機、電話、家電…你哋走唔甩嘅！」

 

 …時間因為渴望中獎而過得特別快，之後嘅獎品當然又例湯無我份。

 

總結今年春茗成績十分理想，兩公婆夾埋攞走一支紅酒一部相機仲有超市現金券，至於遊戲機、電話、家電…忍多你哋一年，出年你哋一定走唔甩嘅！

 

實情係，越貪心越無我份，過程無癮攞苦嚟辛，反而老婆從無諗過要攞獎，成晚輕鬆又開心，你話我係咪活該吖！

---

今晚公司春茗，咁多年以嚟，連抬獎都無中過一份嘅我，忽然好有信心，今次應該可以又食又拎！

 

未開席就參加一個打 Wii 嘅環節，玩奧運會 100m 短跑，贏嘅就攞走部 Wii，第二名五百蚊，第三名都有三百蚊超市現金卷…

 

打機嘅嘢七分實力三分天份，眼見呢次係我獎品零的突破嘅好機會，於是一落場就出盡全力，頭手腰腳背胸腹心肝脾肺腎，將身上所有力氣全數爆發，終於，第一次就刷新最快紀錄，9 秒 7幾！

 

但一玩完就知大獲，因為無熱身，耗力過度之下，兩隻手同兩邊胸肌一下子適應唔嚟，立即痛到入心入肺，我仲要懶老定，炸炸帝忍住痛入廁所，典咗足足十分鐘…

 

返出去嘅時候，依然咬住牙根痛不欲生，心唸雖然咁辛苦，但贏到部遊戲機都係值得！點知一陣子之後，最快紀錄終於被其他人打破咗，而且，參賽者開始掌握到竅門，個個跑得越嚟越快，眨吓眼原本我嘅最快紀錄竟然連三甲都不入，心有不甘之下，忍住痛再上場，誓要攞番自己應得嘅嘢，可惜負傷上陣影響發揮，第二次嘅成績大倒退，10 秒過外，完全大失水準！

 

好彩遊戲容許參賽者無限次挑戰，只要你未暈未死得，對手仲跑得郁（fing 手制）都俾你繼續玩，所以一連玩咗五六鋪，但成績已經無咩突破，總之就係三甲不入毫無勝算…

 

到結束前最後十分鐘，大家都玩最後一鋪，我都唔例外，今次卻係做足熱身，放鬆身心，盡力而為吧！跑完之後， 成績竟然係 9 秒 6，我又一次攞番第一，又一次攞住部遊戲機啦！呢個時候，輪到最後一位參賽者，一個只係第一次玩 Wii，之前嘅成績全部都麻麻，睇落去只係陪跑份子嘅同事，最後一跑成績， 9 秒 5！令我頓時又變成第二，雖然心有不甘，但一來輸贏都要有風度，二來我實在無力再玩多一次，心唸攞個亞軍五舊水都好過無啦…

 

誰不知，主持話要俾個機會另一位韓國同事（之前嘅最快紀錄保持者，亦係我嘅主要對手），俾佢一個最後上訴嘅機會，於是一大班人又睇佢最後一跑，成績 9 秒 57，噢！我眼白白睇住由第二再跌落第三，無奈自己油盡燈枯再跑都無力，惟有接受最終事實…

 

深深體會咩叫做希望越大失望越大，如果一開始就志在參與贏輸無所謂，過程又點會搞到自己咁辛苦呢！

無跑步一段日子，今朝決定天未光就衝落街，痛痛快快做吓運動。

 

沿途感覺超勁爽，黑媽媽風涼水冷又靜鷹鷹，好有 Rocky 特訓 feel ，心裡不停響起佢首主題曲，「登，登登登，登登登，登登登…」

 

 大約一個鐘頭之後，以一身大汗，加埋‘嗄嗄’呼吸聲迎接日出，開始新一天！

 

 

耶！堅持，唔放棄，先係跑步嘅精神呀！

 

今年春節好難得仔仔一堂，一家大細大年初一二去澳門旅行。一行廿人都幾難安排膳食，好彩有阿斌細佬，半個地膽做領隊先解決食玩嘅問題。

 

廿人裡面有四隻馬騮，唔知點解個個都要痴住陳斌，連我呢個姑姐都要行埋一邊。事實證明，同細路仔溝通係唔在乎說話流唔流利，全團講普通話最有廣東口音嘅人竟然最受歡迎。