| Profilo di 斌多士斌多士FotoBlogElenchi |  Strumenti  Guida |
|
24 febbraio 2/14 ~ 2/17 黃山之旅 (III)2/17，屯溪 - 宏村 - 魯村 - 杭州 - 深圳 - 香港
又係一早起身，坐車去寧靜嘅景點宏村，《臥虎藏龍》都有嚟取景呢。宏村唔止靚，條村嘅建築設計仲好特別，可以將湖水引入村，讓家家戶戶都有流動嘅水源，依家留喺度嘅大部份係婦孺，啲婆婆仍然用呢條水源洗衫，唔知下家會唔會又用呢啲水洗米呢？
個半鐘參觀完又趕住去隔離條村，魯村，呢條村比宏村細好多，但裡面啲屋有好多有特色又精細嘅木雕，用以前嘅技術，實在不可思議，可惜文革時期所有雕刻嘅頭都被削去，依家睇番既古怪又婉惜。
半日參觀完特色村莊之後，連續車駁車又駁車，前後用咗成 5 個鐘車程，先搭到飛機由杭州番深圳，由寶安機場到黃崗轉車到鑽石山再到馬鞍山，真係暈暈地！
溫馨提示：
1. 宏村實在值得住番晚，一來多啲時間遊歷兼影相，二來喺嗰度睇日出一樣咁靚。
2. 兩條村都要俾入場費，宏村 $65，魯村 $25，費用已經包咗當地導遊讀解。
3. 由落馬洲搭巴士返香港市區要注意，某啲地方有時間限制，例如到沙田第一城就要半夜 12 點後上車！ 23 febbraio 2/14 ~ 2/17 黃山之旅 (II)2/16，黃山 - 屯溪
朝早天未光就起身，雄斗斗諗住去丹霞峰睇日出，點知落到賓館大門，發覺出面天氣奇差，又黑又凍又大風又大雨，我哋諗咗五秒，都係決定返房等天光好啲，生命誠可貴嘛。
八點攞晒行李離開賓館，開始下山旅程，沿途又霧又雨又凍，四圍結晒冰，就算著住行山鞋都冼到阿媽唔認得，好彩喺賓館隔離間小店，買到黃山特產“鐵鞋底”，不至變成頭文字 D ，飄移落山…
咩住大舊行李實在辛苦，多次上長長石級時大叫救命，死捱爛捱，四個鐘之後終於到咗黃山（前山）嘅索道站，坐吊車落山腳，再轉巴士到屯溪。
喺屯溪入住超平旅館，$120 一晚，環境衛生過得去啦，叫做有燈有熱水有床有被仲有電視添！夜晚逛逛屯溪老街，可惜太凍又大雨，最後被迫去超市買零食啤酒碗麵，返旅館休息。
溫馨提示：
1. 如果行黃山時有雨或超凍結冰，切記一定要買“鐵鞋底”，訂價 $10，越上得高就越貴。另外，最好只帶輕便行李，一定要咩背囊，千其咪做傻事攞拖喼，盞半途掉落山，仲要俾國內同胞笑…
2. 去到屯溪，四處都有旅館酒店賓館，豐儉由人，最緊要可以睇吓間房先決定，有時間不妨慢慢揀。 22 febbraio 2/14 ~ 2/17 黃山之旅 (I)牛年第一個旅行，估唔到會去咗大陸，卻係世界自然文化遺產其中一個熱點…黃山。
2/14，香港 - 深圳 - 杭州 - 西湖
由深圳搭飛機到杭州，只需兩個零鐘頭，轉車到達杭州已經中午，嗱嗱林衝去西湖遊覽，去到先發現原來地方好鬼大，但環境同空氣超正，四周種滿花草，五顏六色，湖邊完全無欄杆，讓你感受咩叫遊山玩水嘅寫意。有時幾隻野鴨喺旁邊呱呱聲游過，我會想起細過時玩丫叉…
撞正情人節，西湖更添情意綿綿，處處戀人，個個拍拖，手上唔係玫瑰就係汽球，我哋兩條佬遊湖償花，有點怪異。
溫馨提示：
1. 如果唔想慢無目的咁行，可預先揾定資料，沿住西湖十境（最近又有西湖新十境），邊行邊影到此一遊照，心裡會有啲滿足感！
2. 總會有當地人走嚟充當導遊，撩你包車兼介紹西湖名勝，你幫襯就要預咗佢帶你去睇什麼‘龍井試茶’、“真正絲綢”，乘機氹你買嘢，你齋睇唔買，條友會黑面！
3. 名菜“東坡肉”必試，越肥越正，送飯一流。
2/15，杭州 - 黃山
晨早七點搭車去黃山，車程四個鐘，直接到黃山風景區，可惜當日天氣又凍又落雨，我哋咩住晒啲行李，份外狼狽。坐吊索加行山，個幾鐘先去到北海賓館，一放底行李就趕去睇日落，可惜又落雨又大霧又凍又攰，最後日落就睇唔到，但經過好多出名松樹，好似“連理松”、“黑虎松”、“團結松”，可惜無“梁錦松”同大懶蟲。
夜晚十點就瞓，除咗散散哋之外，因為聽日先係戲肉，睇日出兼落山（攞晒行李）！
溫馨提示：
1. 黃山入場費每人 $120 人民幣，但有學生証半價，我問過收銀姐姐，佢話總之你攞得出就平一半，但我無帶呢！吊索就每人 $65，相比起睇醫生或切除對腳嘅費用，實在抵到爛，尤其落山又有行李，咪死撐轉頭反白眼。
2. 幾乎所有旅遊書同網上都提議喺山下買糧食上山，價錢相差好遠，碗麵乾糧一定要買，唔係上到山就任人劏架啦。
3. 雨褸雨褲手套必備，擋風擋雨又保暖。另外賓館有雪褸（北海賓館），睇日出時可用，但整得太濕賓館要收 $50 烘乾費。 07 febbraio 2009 公司春茗一年容易又春茗，今次主題「牛仔之夜」，好多同事都悉心打扮，皮背心皮靴牛仔帽固然唔少得，有啲仲加埋繩同槍，大伙兒盡情玩番一晚。
我最開心莫過於名正言順着爛牛仔褲返工，爽！
繼續多年嘅優良傳統，所有獎都無我份，但老婆就攞 10 年服務獎，老細頒獎時都大嗌：「吓！乜你都做咗 10 年架啦…」
無錯，我哋兩個夾夾埋埋擺咗廿幾年青春喺呢間公司，老細，出年努力呀！ 04 febbraio 二十世紀教仔網絡早幾日拜年時，見識到新一代教仔方式…
場合有長輩有平輩更有晚輩，唔記得話題，只記得長輩話一，但小朋友話唔係一，各執一詞，大家都咁肯定，講得兩講，小朋友都費時同你嘈，走去電腦 click 兩 click ，唔洗幾分鐘，已經大大聲：「嗱！都話架啦，你過嚟睇吓喇，講極你都唔信…」
我睇在眼裡，心裡暗暗忐忑，我哋上一代嘅教學，什麼‘食飯唔乾淨會豆皮’、‘成日偷食手指生倒刺’、‘吞咗香口膠要做手術先攞得出’、‘唔食魚生白頭髮’、“眼眉調左吉右凶”、“打思憶要閉氣直到面色變紫”…
唉！以後唔想當眾被啲小朋友督爆隨口噏當秘笈，免得尷尬真係要做吓資料搜集先好講呀。
廿年前“長輩說話是對的”已經過時，依家…
識上網 ，咪師父囉！ |
|
|
