假期一過，玩具界即時有新貨番。

 

呢個月新嘢多蘿蘿，星矢死神， SIC ，匠魂…

 

但最矚目嘅肯完係新版合金魂…六神合體，一出就引起哄動，千六蚊仲要訂先有，宇宙船賣緊 $1899…

 

望多兩眼，真係有股衝動由丹田傳去隻手，伸入個袋攞銀包…

 

舊版六神超合金，以前不知多少街童望住佢流晒口水，得個恨字。

 

今日，街童將大了，重遇新版六神合體，好想征服佢，同佢死過！

賽前兩隊都咁好狀態，兩隊都有神射手，點解賽果會輸咁多…

 

龍門失準，俾「布朗」頂入，輸 0: 1 嘅時候，相信所有利記粉絲都有個信念，我哋一定追得番…

 

誰不知王子無啦啦被罰黃牌，神經查蘭奴又衝埋球證度爭論，嘈得兩嘈，我都心知不妙，啱啱大叫「阿仔！冷靜啲呀…」，球證已拔出一張黃牌，不能相信嘅情景，神經仔兩黃一紅被逐離場…

 

之後點樣入第二三球都已經唔重要，我心口納悶，谷住道氣足足五十分鐘！

 

可惡！屍朗臨尾重要懶勁玩插花，真係睇到火到嚟埋！

 

興過火屎！！！！！！

今晚同好友趕住入場睇「奪帥」，貪有贈券唔洗錢，加上「殺破狼」班底，片長兩個鐘仲要三級血腥，所謂唔睇得都打得，梗係捧場啦！

 

誰不知故事犯駁位甚多，完全不能以常理推斷；演員多到唔知點安排，變相有啲出兩嘢鏡又無咗，慘變路人甲乙丙…

 

最搞笑套戲標題係「順應天命者 悲，抗逆天命者 死」 ，我到依家都唔知邊忽講天命，邊忽講抗逆，剩係啲演員不停死死死。

 

呢刻仲有啲暈，將來出影碟可以一睇，但請抱住睇喜劇心情，你會好過啲！

 

**ps: 動作片痴阿強今晚嚟唔到，未必係壞事，老實講，你同老婆對打分分鐘仲精彩，期待你哋套「殺破強」！

 

 

奪帥官方網址 

某日收到「中電」一張宣傳單張，平時睇到唔睇，即時撕開十八塊掉落垃圾桶。

 

當日一望卻久久不能放低，深深被單張上嘅男模吸引住，嗰種瀟灑裡帶踏實，粗獷中又風度翩翩，硬係覺得好似認識嘅一位猛男朋友！

 

嗱嗱聲好好收藏，話唔定呢個係廣告超新星誕生前嘅作品呢！

 

噢！側面都咁殺食，擺個三七臉托腮 post ，火數隨時勁過中電！

「巴打精」籌備好耐嘅台灣之旅仲於圓滿結束，四條佬四圍逛飲飲食食，無咩指定要去嘅景點，反而輕鬆寫意又開心。

 

趣事都有幾則：

~臨出發 Check In 時先知道過咗入閘時間，好彩航空公司幫我哋轉下班機，只係遲多個零鐘！

 

~團友阿星要趕功課，頭兩日要犧牲行街時間留响酒店做功課，還好兩日搞掂，最後一朝可以衝出街玩！

 

~有晚去杜小月食飯，點咗個貴價餸‘烏魚子’，出乎意料咁難食，又腥又黐牙，最後惟有猜輸嗰個食啦（作為大懲罰最啱）！

 

雖然人少少，但渡假感一流，晚晚玩到夜一夜都唔怕，最緊要唔洗掛住同另一半報到吖嘛。

 

 ~右邊啡色嗰幾塊就係令團友聞之色變嘅杜記「烏魚子」

 ~點解唔揾人幫手影張大合照架！？

今晚利勿浦順利贏國際米籣 1:0 ，英格籣出四隊打歐聯，依家四隊都入八強，英國球會奪冠機會大增！

 

星期五就抽籤，又睇吓結果係 BIG 4 自相殘殺吖，還是咁好彩分道比賽，叫四飛！

老豆搬咗去上水，今晚一家人去探佢，參觀之餘順便食飯慶祝佢生日。

 

酒樓啲餸麻麻，隔離房啲人唱 K 又劏雞咁聲，卻無損我哋開開心心食餐飯，期間都有唔少第一次令我印象深刻…

 

老豆第一次點菜，平時問佢，佢都好肯定咁答…「是但啦！」，今晚竟然用中文講：「豆腐煲！」

 

食食吓我第一次同佢「亨」杯，祝佢生日快樂，身體健康。

 

食完老豆竟然話要埋單，請我哋食飯，呢下真係我至今第一次聽第一次見…（早知食龍蝦老鼠班炒蟹啦！）

 

除此之外，當然仲有大家嘅交談同笑聲，見證我哋一家人都在轉變中。

 

老豆，生日快樂！