| Profilo di 斌多士斌多士FotoBlogElenchi |  Strumenti  Guida |
|
29 aprile 去到札幌啦日本之旅第四日，剛剛由大阪飛到札幌，繼續咀不停喪食振興中華大使命，不嘔不休…
今日四二八亦係大日子，好友強妹成親一週年，隆重其事，大顆兒決定食好啲食飽啲，於是拉麵、芝士漢堡包、刺身、壽司再食拉麵…返酒店時個個抱住個肚，痛快痛快！
喺度祝余氏夫婦時時活潑恩愛，常常跳脫幸福。
仲有五日旅程，革命尚未成功，餓鬼仍須努力呀！ 24 aprile 努力地…扮嘢聽日就出發遠征東瀛，今日喺公司，靈魂早就出竅，飄到彼方嘅櫻花樹下，一手攞住拖羅，一手攞住清酒，世風日下，亨住「Sakura… Sakura…」
哈哈，做嘢咁款，卻心在日本！
**小朋友切勿模仿，當中技術需要長期練習。 23 aprile 歐聯準決賽首回合利記 1：1 車仔
作為紅軍粉絲，上場對兵工廠已經三次心臟病發，慶幸最後都贏到…
今場大好形勢，後衛懷斯竟然喺最後九十幾分鐘擺個老烏，一頭頂入自己龍門，失咗個好重要嘅作客入球，呢吓真係「臨天光賴尿」！
對住電視 O 晒咀，簡直呆若木雞…
**下星期次回合身在日本，無得睇，唔擔心就有鬼！！！
20 aprile 雙蛙合壁，一定認識！浣熊過後，今日天氣好番好多，雖然無太陽曬住，但起碼唔再係滿天狗史兜頭淋，有姐等如無姐…
雨過天晴，連青蛙都蒲出街玩，今日崇拜完經過教會附近條樓梯，發現一對恩愛蛙蛙，一大一細，細嘅騎住隻大嘅，品種幾特別，令我不其然走埋去，吸嘢之餘，又用雪糕筒，又用樹枝嚇佢哋，吖…但佢哋點都唔分開，好似已經合體變成一隻大青蛙，完全無被我影響，各散東西！
可惜喺呢個時候，老婆喺我背後咆哮…「夠啦！唔准再搞，即走…」令我依依依不捨離開！
19 aprile 4/25 - 5/4 北海道之旅籌備數月，北海道十天豪華團好快就喺嚟緊星期五出發啦！
—團四人兩個家庭兩對男女四個喼，將會上足子彈束起衫袖縛好頭巾，瞪大對眼揸實拳頭咬住咀唇，離鄉別井遠赴東瀛，誓要食盡長腳蟹和牛燒元貝拖羅海膽拉麵壽司刺身…總之，心口一個勇字背脊一個錢字，當埋條底褲都要食好啲，豁出去呀！
**特別鳴謝隨團兩位太太，過去好長時間，費盡心力計劃旅程，每個細節都照顧周到，所以話，女子喺安排方面確有一手！
同時，唔好忽略男團友們嘅百份百支持同信任，呢段時間不停高呼：「所有行程住宿機票唱錢執行李，交晒俾妳哋啦！」
15 aprile 老豆出院了剛做完小飛俠式心臟手術嘅老豆，精神好好，同隔離床不知幾老友，走嘅時候要逐一道別，連男女護士都走嚟 say bye ，令我同阿媽愕晒然，又會咁老友嘅！？
難關過後，老豆轉變不少，除咗通完波仔，做完磁力共震，裝咗心臟起膊器，又決定買轉治睡眠窒息症嘅呼吸機，跟手會喺屋企裝埋平安鐘，由內到外大裝修，死過番生嘅硬頸老人家，依家終於學懂健康嘅重要，好好照顧自己嘅身體。
我卻發覺，老豆唔知係咪裝咗起膊器，有啲啲胸肌，MAN 咗！ 09 aprile 利勿浦 4:2 阿仙奴今晚讓我感受咩叫做峰迴路轉、扣人心弦、振奮人心、一分鐘地獄一分鐘天堂…
深夜振臂彈起大叫好幾次，樓下嘅鄰居多得我唔少！
最重要嘅係，勝利屬於正義嘅！嘿嘿…（自言自語） 06 aprile 心臟起搏器老豆做完詳細心臟檢查，結果好壞消息各一；
好消息： 心臟血管正常，無須通波仔或做搭橋手術 ！
壞消息： 心跳失常可能因為老化，醫生提議安裝「心臟起搏器」，手術更大，費用亦由三萬幾變成十幾萬！
以老豆性格，大嗱嗱十幾萬當然牙痛咁聲，所以一家人會見醫生之餘，亦會見見社工，傾傾有無辦法。
無論如何，總相信一定有出路，期待有日老豆好似小飛俠一樣坐起身，拍拍心口精神奕奕，叫一聲「出發」，我哋同你一齊行公園！ 02 aprile 突發性心臟病今日再去醫院探老豆，佢一醒就話要睇報紙，仲係要東方，聽佢咁講就知精神一定好番好多啦，起碼唔係話要睇南華早報，我都無咁驚！
見醫生時，醫生話係‘突發性心臟病’，雖然依家情況好咗好多，但尋晚着實非常危險，好多人就係瞓瞓吓病發而一命烏呼，所以一定要做個詳細檢查，聽日要轉送老豆去威爾斯，檢查心臟血管之餘，可能做埋‘通波仔’…
一切都要等聽日檢查完先知原因。
大家都覺得老豆今次好好彩執番條命仔，好彩煎魚先暈，好彩樓下有診所，好彩間診所無人等，好彩個診所醫生夠果斷，好彩無叫白車，好彩個的士佬好人，好彩及時去到醫院…
我心卻寒了一截，原來自己好耐都無打電話俾老豆，今次算係一個提醒，往後日子要多關心多留意呢位老人家，否則後悔已經太遲啦！ 老豆暈倒了今晚老豆忽然被送入心臟科深切治療病房，皆因煎煎吓魚忽然勁頭暈，落樓下診所見醫生時心跳又亂晒籠，傾傾吓暈底咗，醫生大驚之下急轉送北區醫院… 我哋匆匆趕去，到達時見老豆已經搶救完，心跳正常番，身上卻插住好幾條膠喉，麻醉過後重有點昏昏迷迷… 我企喺床邊呆望，只見有嚴重睡眠窒息症嘅老豆透氣透得異常辛苦，好似拼命吸好多口，先有一口落到肺一樣… 之後姑娘叫我哋嗌醒老豆，同佢傾吓計，老豆醒來，第一件事就話，條魚仲喺個鑊度，記得幫佢將條魚放入雪櫃…講唔到幾句又瞓着咗…真係吹漲！ 曾幾何時，我對住呢位打交第一目標，日日張牙舞爪，嘈交鬧過口沫橫飛，一副兩個只得活一個嘅格局… 今晚，我卻心裡默默同老豆講，你一定會無事，快啲好番，我會為你祈禱，加油！ |
|
|
