喺公屋長大，無乜康樂設施，所以打籃球有人撩鬥波，踢波又有人跟隊，就連打乒乓波都有人嚟挑機…即係猜枱！

 

情形通常都係打打吓乒乓波嘅時候，有人不懷好意，衝埋嚟大叫：「猜枱！」

 

呢個時候，如果唔接受挑戰，可以即時離開，無咩損失，只係讓咗張枱俾人哋玩…

 

但如果唔忿氣，接受挑戰，雙方就會先打一盆，多數七分，勝方可以「話事」！

 

「話事」其實即是定規矩，由勝方定出之後猜枱細節，比如：三盆十一分、或一盆廿一分、或每邊各派兩個人打…諸如此類！

 

但戲肉其實係佢定嘅猜輸罰則，比如：猜輸要留波（即輸掉一個乒乓波）、或留板（即輸掉一塊乒乓波板）…而最最最惡毒嘅，莫過於…

 

輸咗要留波留板留底褲！

 

當時個個一聽到都聞風色變，除非有百份百必勝嘅信心，否則只有忍痛讓咗張枱俾人哋打。

 

其實我到依家都唔明，猜枱贏咗啲乒乓波同乒乓波板都起碼可以吹噓自己有幾勁，但攞住人哋條底褲，又有咩用呢？

 

自從終極紐計骰落得粉碎下場，我一直都耿耿於懷，因為呢個 7x7 只係玩咗短短日子，咁樣無啦啦跌散晒，唔抵不再話下，買個新嘅竟然要三舊水，即時激起我無比決心…

 

怪醫陳博士上身，即做回魂手術！

 

原來一個 7x7 扭計骰散咗，會碎出 343 粒組件，我足足望咗一個下晝，摸下排下度下砌下，完全無從入手…

 

直至老婆加入，從旁幫手順序分類，令我可以專心一粒一料慢慢砌（好似大醫生旁邊嘅護士，遞吓水又抹吓汗）…

 

經過一個鐘頭嘅手術，我哋竟然成功救番 7 仔，將佢由幾百粒變番成一大粒，當砌入最後一粒之後，我再忍唔住，大叫：「耶！Give me five！」

 

 1. 先順形狀排好，但未有頭緒點砌…

 

 2. 搏一搏，拆晒組件落嚟，一粒一粒重新砌過…

 

 3. 雖然完成 1/8 ，但仲未掌握到點砌…

 

 4. 老婆出手幫拖，傾吓講吓慢慢領悟到點砌啦！

 

 5. 完成咗一半，既緊張又興奮！

 

 6. 完成 5/8 ，我忽然心諗，唔會最後爭一粒咁黑仔卦？

 

 7. 完成 3/4 ，依！乜咁似食鬼？仲有牙添！

 

 8. 最後一忽，緊張嘅鼓聲開始奏起…

 

 9. 耶！手術完成，終極 7 仔番生啦！

尋日喺公司玩個終極紐計骰，正當玩到伸晒脷嘅時候，忽然公司電話一響，手一鬆，個扭計骰就咁跌落地下…

 

呯…唦…

 

粉碎了！

 

 

  

為犧牲咗嘅 7x7 默哀一分鐘。