2007年5月15日至22日，係我哋日本亨李滿之旅，在此當然要稍作報導吓啦。

第一日，香港 – 日本新宿（入住Century Southern Tower Hotel）  

趣事點滴：

首晚十點幾鐘喺酒店附近，見到啲日本白領陸陸續續放工，有個奇怪現象，就係絕大部份嘅白領都係著黑色西裝白色恤衫，好少有其他顏色，我哋兩個身處人群當中，感覺有點似拍戲。 

酒店隔離有間專賣‘東甩’嘅食店，名叫‘Krispy Kreme’，長期維持幾十人排隊，場面好不誇張，我哋初時都係隔岸影相，不以為意亦無時間排隊試吓味…

當晚接近十一點，行完街唸住返酒店，咁啱經過間‘東甩’店，可能就嚟關門，發現得番廿零個蘿蔔頭排隊，兩公婆決定趁吓熱鬧，排隊試吓有咩咁巴閉，排咗十零廿分鐘接近終點嘅時候，啊！原來‘東甩’店會每人送一個東甩慰勞吓，我哋一人一個，當然要即時試食啦…新鮮出爐加上唔洗錢，真係零舍好味，一試難忘，八粒星（十粒滿分），食完兩條友炸炸帝走人無幫襯，實行趙完鬆！ 

第二日，新宿 - 汐留 - 台場 - 澀谷 - 新宿 

趣事點滴：

喺汐留試食頗出名嘅‘汐留拉麵’，鋪頭門口看圖買飛，唔洗雞同鴨講，好方便，味道亦如書中介紹一樣咁出色，七粒星。 

喺台場Deck Tokyo Beach.裡有達地方，叫做台埸一丁目商店街，鋪頭賣嘅全部都係兒時食品，什麼三粒糖、爆炸糖、眼鏡糖…各式各樣，令我忍唔住狂掃一大袋，買嘅時候啲回憶番晒嚟，童真萬歲！ 

嚟到台場，當然要睇吓豐田Show Room啦，呢度有間Café，裡面有賣雪糕麵包，外熱內冷，好好味，七粒星。 

旁晚衝去澀谷，可惜行一陣已經九點幾，好多商鋪都關門大吉，仲想行吓想—間高級版100Yen店添（Three Minutes Happiness）！ 

今晚發現部相機無晒電，叉電機又無帶…點算好呢？ 

待續…

婚後第一次兩公婆一齊返工，一齊搭公司車…

 最遲起身時間正式演習，兩個人一個洗手盤一個厠所一個風筒一塊鏡，難度增加，但我相信，好快可以充滿默契，未到最後一刻都唔彈起身…

 老婆摺被好有性格，摺完好似無摺，一樣咁大張！

 兩個人慢慢適應張“席夢豬”床褥，一瞓到天明，死豬一樣！

 生活真係充滿樂趣！

公元二零零七年五月十二日，我哋結婚啦！

 

當日縱使不停講多謝，始終仲有遣漏，喺度補番數…

 

婚前最後一日，失眠、心煩、大力嘭門，總之就好鬼緊張！

 

今朝晨咁早就起咗身，衝落街歎個早餐，火腿餐肉煎蛋公仔麵，餐包凍茶加份報紙，好似身在‘逼貴園’，it is quality of life！

 

之後返老家執嘢， 咁啱全家人連埋舅母表妹喺晒度，即時變咗答問大會，邊度 set 頭、幾時補妝、襯邊條呔、幾點回門、幾多兄弟姊妹、封幾多利事、揸車點去教堂同酒店、係咪兩個一齊上台簽名…真係兩個人都答唔切，何況得一條友！

已經不斷提醒自己放鬆啲，慢慢嚟，但身陳代謝呃唔到人，全身冒汗，滿面通紅，正想嘭門之際，唸到其實大家都係着緊我哋嘅婚禮啫，出於好意，心情自自然平靜落嚟，跟住有傾有講有說有笑，仲可以夾雜少少國語少少英文，體會到情緒影響表現，要練習“燥不得”

 

跟住約咗肥佬肥太，幫忙搬禮服，又尖咀又金都又教會又酒店，真係辛苦晒！還好四點零搞掂晒，一齊歎個 tea，肥太特別好胃口，鯨吞一舊 cake，眼見呢個姊妹豪情萬丈，聽日接新娘遇着佢有一定難度，好在一物治一物，佢老公肥佬係我兄弟，阿煮，靠你啦！

 

天黑之後各自同屋企人食飯，盡量令自己平靜，養精蓄銳…

 

只是，就嚟做人老公，心情點會輕鬆！

我哋結婚啦…

 

日期：二零零七年五月十二日（星期六）

時間：下午二時三十分

地點：九龍深水埗大埔道五十八號，深水埗祟真堂

 

蒞臨觀禮，共證主恩

陳斌  鄭依嫻

終於開始放假啦！

 

但今朝一起身就唔妥，全身無晒力兼周身骨痛，好明顯感冒起…結婚先嚟病，唔通連醫生都掛住我？

採！大吉利事…吐吐，講過講過！

 

中午山長水遠去青衣裇個靚髮，幫襯咗十幾年，剪開有感情，髮型師又夠細心…惟獨一樣嘢麻麻，就係每次吹個頭都一式一樣，十足‘弱智浩二’！

 

下晝同化妝師傾婚禮當日嘅安排，化妝師好鬼專業，點襯衫點襯頭飾點襯髮型，仲猛話多士似鞏俐，當日誓要化個鞏俐妝…

我心唸，鞏俐喺黃金甲套戲裡面有啲激，我當晚唔會拖住黃金戰士進場卦？

 

之後與阿力多士三條友喺尖咀海旁飲杯咖啡，吹吹水，偷得浮生！

 

舅母與表妹剛由印尼到埗，遠度而嚟參加我哋嘅婚禮，多謝晒，亦因為咁，今晚要去新屋瞓啦。

 

另外，阿強兩公婆亦由歐洲凱旋歸來，浸過減水，真係連笑聲都有啲似鬼佬，我嘅兄弟團又多名猛將啦！

 

仲有兩日，絕對唔病得！

 

 

 

今日係婚前最後一日返工，亦係最後一次以單身身份揸公司車、‘嘟’咭入寫字樓、log in 部機、去茶房針水、喺厠所洗手…

 

多士攞咗半日大假，提早離場，廿幾號先返工啦！

 

中午點零鐘與多士一齊衝去觀塘攞印好嘅程序表，連埋食個快餐，過晒鐘先返番公司，五點半又收工…

所以唔係我會做好呢份工，係我要保住呢份工先啱！

 

旁晚與多士加伴娘喺尖咀某婚紗店作最後試衫，試埋啲飾物呀鞋呀， 襯吓呢樣又襯吓嗰樣，大家都對店員讚不絕口，服務態度實在無得彈無得頂，今時今日咁嘅服務態度先電架嘛！金都女，學嘢啦…！

 

晚飯約咗幾個佬，吹吹水互相關心一吓，事源某弟兄呢排被工作壓力嚴重影響，食唔安坐唔落，連瞓都無覺好瞓…

希望你快快適應新工作，多祈禱，多啲講出嚟，唔好太悲觀，我哋期待見到你挺起胸膛，大叫我做得到！

 

午夜返新居與多士摺程序表，話咁快就摺起百幾張，明天繼續。

 

仲有三日…點解咁快架？

今日雖然返得半日工，但同事們第一句總係問：「依！仲未放假咩？」

 

我答：「星期四先開始放假，多謝關心。」卻心想：「嘿嘿，你見到嘅只係一個軀殼…」

 

中午與多士家人飲茶，大家都好似被星期六嘅喜事感染，氣氛開心又輕鬆，你一句我一句，不奕樂乎。

 

之後兩個去咗酒店試吓DVD, VCD, CD play 唔 play 到，一切順利再去飲杯咖啡，望住個海傾吓計，浪漫一下…

 

亨李滿日本之旅酒店機票訂好晒，呢段時間狂睇書，選定目標地點誓要玩餐飽，還好身邊朋友好多意見提供，無煩惱！

 

**要常常提醒自己，好好享受兩個人同心搞婚禮，一切都有商有量，無壓力無壓力…

 

仲有四日就係大人啦，醒啲！

 

今日終於輕鬆一點，唔洗超忙碌，勁受壓…

 

祟拜時牧師宣佈星期六係我哋結婚大日子，仲請我哋企起身…平時見人哋無咩嘢，今日輪到自己就零舍緊張，無怪乎起身嘅時候真係好鬼生硬，有啲似兩碌葛…

 

Lunch一條友去咗教會附近食油渣麵，呢間位於萬寧隔離再隔離嘅春潤堂，鋪仔細細又鬼咁多人等，自己最欣賞佢啲豬油渣竟然仲係脆架，食嘅時候十分有咬口，可惜呢個世代一切有油皆無益，何況豬油渣呢！

 

中午一條友喺新屋，聽吓音樂飲吓汽水，好鬼優皮…唔洗十分鐘就入夢，一瞓至日落，真係懶到出汁，俾錢宿骨，哈哈，我鍾意！

 

夜晚盡最後努力核對程序表，先要多謝幾位弟兄姊妹幫手檢查，唔知係咪打機成日玩‘找錯處’，好細心又認真，利害利害！

仲有當然要感謝大夫，連小柏都唔耐煩，係度呱呱叫，你卻不厭其煩，幫忙繼續改繼續執，辛苦晒，今晚之後就脫苦海啦！

 

 仲有六日，問你驚咁驚？

 

今日依然要為婚禮努力，卻處處有美妙歌聲，好動聽！

 

中午先與兩個MC飲下午茶，你哋嘅意見，你哋嘅努力，都令我哋滿心歡喜，又充滿期待，果真好有HEART！

 

傍晚探詩班，能夠近距離聽一次婚禮嘅獻詩，感動依然，仲多一份激昂添。詩班嘅弟兄姊妹，辛苦晒，亦衷心多謝大家。

 

之後有幸可以再聽阿力與MayMay嘅獻唱，加埋瑤瑤，見到你哋不斷試唱，落足心機，百份百投入，感激之餘，我都要出分力，就係現場錄影兼收音！

 

飯後探訪大夫，睇到首席設計師為我哋設計嘅程序表，YEAH！無得頂！大夫，感謝你犧牲寶貴嘅睇波時間幫我哋做起佢（利記仲輸波添），又要忍受我哋諸多要求，又呢又撈，辛苦晒！

 

仲有七日咋，要樂在其中，心情輕鬆！

仲有八日就到大日子啦！呢兩個禮拜完全忘記早瞓計劃，晚晚點幾兩點先瞓，繼續落去，行禮當日極可能出現兩隻大熊貓…

 

唸唸吓，不如唔好攞花球，攞竹葉啦！

 

今晚團契，弟兄阿煮嘅祈禱好有提醒，嚟緊呢幾日，實在需要點點安靜嘅時間，休息叉足電之餘，回想一下神喺我哋關係當中嘅幫助，唔好忘記感恩…

 

忽然想起一句說話~~“婚禮唔等如婚姻”