| 斌多士's profile斌多士PhotosBlogLists |  Tools  Help |
|
May 29 停車場儲咗 Q 車一段時間，一直好想買個合適嘅 Display Box，之前喺一間專賣巴士模型舖頭發現啱心水嘅，可惜鬼咁貴，細細個都賣成五百幾蚊！
早前去北海道，喺無印發現一個亞加瀝膠做嘅 Display Box，靚得嚟又防塵又唔貴，一見鍾情可惜無手攞，怕回程整爛所以忍住唔買。
返嚟香港之後依然念念不忘，前排終於有機會去無印睇吓，耶！原來香港都有得賣，比較之下雖然貴咗少少，卻無阻我要買嘅決心。
抱返屋企第一時間放喺書枱前面，擺晒我至鍾意嘅 Skyline，得閒望吓佢哋，感動終於有個停車場泊吓啲車仔，唔洗佢哋成世屈喺櫃桶裡面。
May 28 忽然停電尋晚睇緊恐怖片「月光光心慌慌殺清光」，就在緊張關頭，忽然「撲」一聲，全棟大廈停晒電！
漆黑一片…無燈無電視無冷氣無風扇，得一支電筒，老婆突然醒起，「係噃，我哋有好多蠟燭，依家仲唔用等幾時？」
於是巢吓揾吓，發現原來我哋真係有好多蠟燭，全部都係朋友送，心唸「真係一份體貼嘅禮物呀，遲啲唔知邊個生日呢？」
點着晒啲蠟燭，噢！好浪漫！
加埋窗邊嘅涼風，就係咁，兩公婆渡過一個無電嘅晚上。 May 25 愛登士家庭今日收工同老婆去沙田行街食晚飯，見啱啱出糧於是去咗太興，食好啲。
坐底無耐發現不遠處有一個愛登士家庭超過癮，簡直天作之合黑褲白襪，不得不記錄於此。
得意家庭由六個人組成，三代同堂，老爸爸老媽媽加中年夫婦仲有對仔女，看似平淡又幸福，奇就奇在個當中嗰個勁癲中年婦人，容我稱佢為希特拉風格嘅師奶，簡稱希特奶！
希特奶一開始就不停鬧啲屋企人，人人有份永不落空，先鬧老爸再省阿媽，跟住阿女、老公最後鏟埋個細仔。只見希特奶起勢咁鬧，嚟嚟去去其實不斷重複某啲字，甚麼「你都無腦嘅、反醒吓啦、慚唔慚愧、頂你唔順、不知所謂…」
我睇在眼裡不禁驚訝竟有人如此有語言天份，B Lee 巴拉連珠爆發口沫橫飛指手畫腳，講嘢無豆號氣都唔喘一吓，如果希特奶唔係坐卡位中間，相信佢一定單手叉腰棟高隻腳，誓要鬧到屋企人以「隊穿牆」式噴血為止！
另外，愛登家庭其他人活喺希特奶恐怖統治之下，為免被口水當面射死，全部只能以菴鶉形式接受教訓，頭 Dup Dup 排第一嗰隻。希特奶一鬧完食飯嗰刻，就係其他人傾計嘅時候，傾得無幾句，希特奶一開聲其他人就變菴鶉，希特奶一食飯大家又傾計，如此循環，睇到我由心笑出嚟，實在過癮！
適者生存，換轉係我一樣變菴鶉，食餐飯啫。 May 22 無與倫比嘅歐聯決賽2008 歐洲聯賽冠軍杯圓滿結束，最後決賽由兩隊英超包辦，終極戲碼，曼魚火拚車仔。
雖然兩隊都唔係我飛弗，但還是捱夜睇直播，的而且確，非常緊張刺激。
上半場上半段，曼魚攻得極出色，有隊形有節奏，入得一球好可惜。
但之後時間，車仔站穩陣腳，攻勢開始，不但完半場前追番一球，下半場仲出現一球中眉一球中柱，幸運之神已經靜悄悄離開車仔，企喺曼魚一邊。
除咗鬥攻門鬥防守，球員埋牙亦毫不錫身，互不相讓，最後 8 面黃牌，紅牌都有 1 張。
全場總比數一比一，加時不分勝負，最後惟有進行超殘忍方法，十二碼決定誰是歐洲最強。
頭兩輪十二碼大家都入晒，去到第三輪，屍朗主射，又玩窒步卒之宴客，被車仔龍門屍字救出，抵死！
之後四個球員全部射入，去到最決定性一刻，由車仔隊長泰脷主射，只要佢一射入，即時宣告曼魚死亡，車仔攞冠軍，見佢雄斗斗昂然大踏步，充滿信心口水一吐，踏踏踏…就在射波一刻，忽然左腳一滑，一跣之下竟然射失…
咁都得！
原來幸運之神不但企喺曼魚一邊，仲幫手攞住香檳準備慶祝成為雙料冠軍，果然，最後第七輪即時死亡再由車仔浪人安力卡射失，結束峰回路轉扣人心弦嘅賽事…
相信短短兩個幾鐘，足以殘殺不少心臟病患者！
恭喜晒曼魚，雖然有人話冠軍唔係要好波，係要好運，但不能否認，聯賽加歐聯冠軍，成就輝煌！
我卻好想知道，出年費爵爺係咪真係退休，狂人魔連奴又係咪入主曼魚？期待期待！
May 18 努力做功課幾日之後就要交功課，今日死死地氣返屋企搏命做…
做咗個零鐘到下晝三點，驚見外邊原來陽光普照，又曬又清爽，立刻用一分鐘時間執拾行裝，泳褲毛巾味鏡梘液洗頭水，對老婆大叫一聲，即落街衝去泳池游水，沿途開心又雀躍，呢刻情緒悄悄回到童年時…
唸起細個同樣情況，被迫留喺屋企對住暑期作業，口咬鉛筆眼望窗外，雙目呆滯口水流流，因為心底默默盤算緊出街玩，落樓下踢波又好，捉昆蟲玩又好，千方百計逃出家園，最後成功逃脫，跳跳扎啦啦啦嘅時候，正正就係呢刻心情，咁多年之後，原來都係一樣！
啦啦啦，唔好意思，我又去玩啦！
功課？！船到橋頭咪直囉！ May 17 重做手術老豆個心臟起搏器裝得唔好，尋日要重做手術補飛。
事源兩個禮拜前一日，老豆喺公園同老友捉緊棋，忽然起搏器漏電，成個人電到彈起，立刻入院觀察兩晚，醫生同起搏器公司啲人 check 過，只知起搏器喺某時某日曾經起動，但原因不明！
兩星期後老豆嚟到醫院覆診，撞到個有經驗老醫生，佢一睇 X 光片就斷定，起搏器裝得唔好，尤其條電線外露咗，要立刻做手術，將電線重新插多次入心臟大動脈。
因為老豆年紀大心臟老化，手術風險正正喺電線拔出嚟一刻，如果心臟大量出血，需要立刻開胸搶救，到時危險大增，咩事都會發生。
於是尋日做手術時不但有醫生同麻醉師，仲有個外科醫生在場，隨時應付突發事件發生，又有幾個實習生參觀，老豆一見心都定啲，斷估個醫生應該有啲料到，唔會喺啲實習生面前搞到一鑊粥卦！？
果然，手術做咗兩個鐘，總算順利平安，無需搶救無需開胸，但老豆話過程勁痛，難捱非常。
希望老豆早日康復，唔洗再進進出出醫院啦。
意外…五月十六日，葵涌貨櫃碼頭接連發生意外…
零晨時份，三號碼頭貨櫃船上兩名工友被電電親，一死一輕傷。
朝早八點，一架貨櫃車喺六號回旋處失事翻車，未知有無人傷。
中午時份，另一碼頭發生貨櫃跌落貨櫃車意外，幸好司機啱啱離開車廂，無做成嚴重傷亡。
午飯時間，二號碼頭一名修理工人被吊箱膠呔龍撞倒，輕傷。
下午時段，一名行人喺散貨倉被貨車撞倒，未知有無人傷。
一時間工作環境好似危機四伏，加上有同事過身，大家心情沉重，不約而同將五月十六日定名為「大凶日」。 May 13 結婚週年光陰似箭，眨眼一年，上年今日正是奇曬無比，熱到無倫，一班壯士陪住老襯衝去娶老婆，過程依然深刻，尤其監生吞食榴槤一幕，真係唸起都作嘔！
今晚去番擺酒間酒店食晚飯慶祝，個無敵大海景依然醉人，加埋安格斯牛柳同鴨肝，重有龍蝦湯，噢！好味呀！
今年要努力，有時間學吓煮嘢食，終極目標係薑葱炒蟹！
不停食食食，身型一年已經立竿見影，隨時變形金剛，化身一團豬腩肉…
總括過去幾百日，生活多姿多彩，當中驚喜處處，樂趣實在不足為外人道…
一切，都從上年一句「我願意」開始。 May 11 熊之館 2作者：咪我囉
今晚入住 KUMASAN 嘅熊屋，一間咁特別嘅民宿，我依家嘅心情實在既驚且喜，興奮得難以入睡，恨不得玩個通宵！
呢間獨一無二嘅木屋，令我想起小時候嘅一個心願…
通山跑嘅野孩子一定有個夢想，就係擁有秘密基地，無論喺樹上定係草叢中嘅一角，你可以喺嗰度同朋友傾計食嘢飲可樂，養青蛙甲蟲蚯蚓貓仔狗仔…
此時此刻，由我踏入呢間屋開始正式宣佈，願望成真！呢度每個角落每個擺設，現場嘅氣氛，戶外嘅大自然環境，都與我嘅五星級基地一模一樣，難以形容心裡嘅滿足，狂影相之餘，晚飯後大家傾計玩遊戲不知幾開心，笑聲不絕，今晚實在難忘！
一晚實在唔夠喉，理想係住夠佢三日兩夜呀！
你有機會到此一遊，可能會揾到我哋留低嘅畫，你會感受到，我哋嘅快樂。 熊之館北海道旅行最後兩晚入住當地兩間民宿，尤以「熊之館」最今大家印象深刻，嘩嘩聲背後，約定每人寫篇感想：
作者：男團友阿強
文字輸入員：另一男團友
今次的大阪，北海道之旅所遇到的開心快樂事很多，除了有一對很好的伴侶同行外，要數驚喜指數爆燈的莫過於位於富良野與美瑛交界的民宿。雖然我是第一次住民宿，驚奇是少不免，但同行的三位團友都一同有這驚喜就不能不在此介紹一下，『KUMASAN』親自興建的這所民宿。 我們是在5月2日6點45分到達。當時天色開始昏暗但仍可看見整座民宿的外貌，我和另一位男團友當時心裡第一個疑問便是「唔係卦！今晚就喺住呢到…？」外表簡陋，地面凹凸沙石多，仲要手抽行李行一條大概一層樓高的木樓梯才到 Check-in 的地方，真係擔心今晚瞓唔瞓得着呀… 但甫一踏入屋內，原來別有洞天。這天只有我們租住，所以可以霸佔整座房屋，內裡的擺設十足十我小時候夢想的房屋，全屋都是實木條鋪建，屋內所有的傢俬也是用木制造。屋內的偏廳中有一個泡茶的火爐，旁邊有一棵楓葉樹，據KUMASAN所講，這棵楓葉樹的樹葉是會隨着四季轉色的，真是滿有詩意。 二樓便是我們的睡房，令我們驚訝的是房外有兩個小露台，其中一個是有兩張凳子面向「十勝嶽」的山景，早上欣賞日出簡直一流，最令我回味無窮的是 KUMASAN 親手煮的晚餐，大多數的蔬菜材料都是 KUMASAN 自家種植，現在大家是否覺得 KUMASAN 好似乜都識，唔單止呀， KUMASAN 還是少數日本人懂得講一口流利的英語，所以大多數的香港人也選定這所民宿。
不過，對於一些習慣早起要沖個涼的朋友就有點失望，因為沖涼房每日只在晚飯後開放一次，其他時段，你要求他也不會開放給你用，不過總括來說，這所包含了大自然風味和自家製食品的民宿也是值得一試的選擇，如果你下次去富良野或美瑛時，不防試一試。 May 07 有相睇日本之旅完滿結束，啲相剛剛 upload 咗上斌多士，千幾張相裡面執吓揀吓，過程讓我再次回味當中每個片段，呢次的確係難忘嘅經歷！
所有相大概分成四部份，有大阪篇、扎幌篇、揸車賞花篇、同玩嘢篇…
睇番啲低能弱智嘅表情動作，不禁回心微笑，實在太白痴喇！
**回味不只一次，旅程中阿強拍底好多 viedo ，遲啲有排笑，不得了！
|
|
|
