| 斌多士's profile斌多士PhotosBlogLists |  Tools  Help |
|
May 28 沙巴之旅 5/19~5/23 (II)第 3 日：遊神山…公園，旁晚喺酒店海灘睇日落，晚飯去食肉骨茶。
斌貼士：如果去神山唔係住番晚，唔係睇日出，齋行吓公園影吓相玩吓渡木橋，建議唔好去啦，因為一來一回車程都 7 個鐘，費時失事，慳番啲時間游水好過。但如果真係非去不可，建議唔好報 local tour ，包架的士仲化算，價錢 400 馬幣，仲有廣東話講解，電話 016-8039058 老楊 or 016-8373721 老林。
另外，當地肉骨茶有 2 間最出名，“佑記” 當歸味濃，當地人最喜歡，“新記” 就用沙煲滾住上枱，有特色又有氣氛，我哋至愛！
第 4 日：買手信，喺酒店游水曬太陽玩健身，黃昏玩瑜家，晚飯再去食海鮮，之後飲嘢聽歌。
斌貼士：再戰 “双天” 海上鮮，今次終於食到老虎蝦，口感同琵琶蝦不相伯仲，果然好味！仲有魔鬼魚，相比之下味道麻麻但唔貴，一試無防。最後一晚 4 條友喺酒店聽吓 live band 唱歌，飲杯 long island ice tea 吹吹水，至 hea 優皮莫過於此…
第 5 日：食酒店自助早餐，海邊坐吓飲杯 drink ，1100 離開，結束沙巴 5 日之旅。
斌貼士：食足 4 日自助早餐依然咁好味，值得推介，尤其是係個格仔餅。 May 26 沙巴之旅 5/19~5/23 (I)期待以久，陽光海灘嘅沙巴遊終於圓滿結束。
總共去咗 5 日，除咗第 1 晚落雨之外，日日都陽光普照，曬到無倫，I love it !
第 1 日：下晝到埗，即晚衝去市中心“双天”食海鮮。
斌貼士： 海鮮推介“老虎蝦”﹑“琵琶蝦奶油煮”﹑“迷你象拔蚌蒜蓉蒸”，因為太多人幫襯，建議當日下晝打電話留定 “老虎蝦” 同 “琵琶蝦”，否則有機會賣晒，電話 014-3765687，揾Annie Chan，放心，佢講得一口流利廣東話。
第 2 日：坐快艇出島玩水上活動，旁晚做 massage ，晚飯去一間出名餐廳 “Secret Recipe” 食多國美食，順便慶祝女團員生日。
斌貼士：水上活動係沙巴嘅重點玩樂，我哋去咗一個名為 “沙皮” 嘅島，記住一定要玩浮潛，事關喺好近好淺嘅水域已經有好多珊瑚，水清沙幼，仲有好多魚添；另外，推介一個名為 “飛魚” 嘅水上活動，過程刺激滿分，每秒都彷似嚴刑迫供，個個嗌到拆天，玩完嘅時候仲齊齊整整有手有腳，真係感恩！4 人同行得 3 個有玩，其中 1 人幸免於難，名字不便透露，不過無咗佢就無得將過程完整紀錄落嚟，真係勞苦功高！
待續…
 超激“飛魚”，厭命長可連玩幾次！ 超好味嘅“奶油琵琶蝦”，滿分！ 第 1 晚就食海鮮宴…May 12 結婚孖週年同老婆一齊攞日假，瞓到晏一晏先起身，今日慶祝主題好簡單，就係最緊要 Hea ！
中午去咗大學站隔離新開嘅凱悅酒店，食個自助午餐，所謂眾人上班我獨 off ，唔洗爭可以慢慢歎，一邊吉西瓜一邊刨雜誌，一食就三個鐘！
當中不得不推介嘅食物，莫過於叉燒，熱辣辣又唔咸，點點燶仲要半肥瘦，咬一口嘅時候不禁吶喊，「叉燒，多可愛叉燒…」，喺酒店食到咁好味嘅叉燒真係出乎意料。
黃昏衝出鬧市，去旺角行吓街，晚飯試試位於煙廠街嘅“麻酸樂”，老婆點個“鮮茄蛋花湯底”嘅米線，清清哋酸酸哋，份外開胃。而我就點咗個“招牌十式米線”，十式包括手打肉丸、栗米雞丸、香草牛筋丸、菜莆肉碎煎蛋、三色蛋白、蜂巢豆腐、素心竹、炆冬菇、金菇、時菜，麻辣湯底梗係要中辣。
碗米線上枱時平平無奇，無話成吋辣油浦面，但一入口就立刻有刺辣感湧上大腦神經，如果點咗勁辣，後果堪虞 ！
夜晚繼續 hea ，留喺屋企睇電視，可惜無柴九追！
兩週年無驚天動地慶祝，我哋兩條友遊吓食吓，不奕樂乎！ May 11 飛髮啦！不經不覺，原來已經幾個月無剪頭髮，呢段煩惱絲不停生長嘅日子，朋友見面彷佛唔記得我個名，以感覺稱呼…
所以我又名叫長毛、監蠆、死飛仔、Blue Jeans、野人、蕉人、狼人、厲鬼、怪獸、基佬、御宅佬…
更甚仲有地拖、掃把、乞兒、屎…
真係形象百搭，最緊要長頭髮！
卒之，今日放工衝去髮型屋，痛痛快快剪短佢！
  耳仔重見天日啦！ May 06 鯉魚門食海鮮同公司一班嘩鬼去鯉魚門食海鮮，10 個人嘈喧巴閉，好鬼開心。
間酒家位於街尾，若非有熟人介紹，肯定唔會行到咁入。但去到揀咗近海邊張枱，先欣賞港島日落，再去揀海鮮…
今次老闆推介：
聖子皇，豉汁炒
小象拔蚌，蒜蓉粉絲蒸
大賴尿蝦有糕，椒鹽炒
大虎蝦有糕，清湯煮，伊麵底
花蟹，蛋白花鵰蒸
花螺，辣酒煮，超勁辣與小辣各一
之後當然仲有：
南瓜豆腐海鮮湯、薑汁炒芥蘭、海鮮炒飯、壽包…
走嘅時候個個抱住肚腩，盡興而回，好味！ |
|
|
