| Profilo di 斌多士斌多士FotoBlogElenchi |  Strumenti  Guida |
|
23 giugno 妙問妙答公司係個麻甩佬聚集嘅地方，平時交談無須客氣有禮貌，常常你串我，我窒你，十分好笑又頂癮，以下輯錄咗四段經典對話，你會驚訝，有啲人嘅轉數可以快成咁…
1.
同事甲：「喂！幫我 call call 電腦部，啲機好慢呀！」
同事丙：「點慢法呀？係咪成日‘漏斗’呀？」
同事甲：「唔係呀！係水壺呀。」
同事丙：「…#$%@」
2.
同事P：「嘩！做咩剪到咁短呀？」
剪完頭髮的同事K：「係呀！原本想再短啲，但個髮型師話太短唔好睇。」
同事P：「乜你覺得依家好好睇咩！」
同事K：「…#$%@」
3.
同事L：「依，做咩今日唔帶飯呀？」
同事B：「唉！個飯盒爛咗呀！」
同事L：「早講吖，送個盒俾你嘛！」
同事B：「對我咁好！？」
同事L：「係呀，送個鞋盒俾你呀！」
同事B：「…#$%@」
4.
花名‘豆腐’嘅青年打電話嚟公司：「喂，我係‘豆腐’呀，邊位呀？」
同事T：「我係你老豆‘黃豆’呀，咩事呀？」
豆腐：「…#$%@」（再加一連串粗口）
一班‘打交未贏過，嗌交未輸過’嘅同事！
20 giugno 日本亨李滿 完結篇第七日，新宿（大都廳） - 築地 - 秋葉源 - 上野 - 新宿（大都廳） 趣事點滴： 重頭戲！知道今朝要去築地食超新鮮魚生壽司，兩公婆一早已經做好準備。 朝早七點就去食自助早餐，淨食水果，留定個肚陣間食好嘢。八點半到達築地，揾咗十分鐘先去到魚市場，見到好幾間魚生店都大排長龍，惟有揾旅遊書介紹最貴嘅一間名叫‘鮨文’（音：旗），竟然無人排隊，如是胆粗粗幫襯，試一個魚生拼盤，五千幾日元，一啖落口，噢！真…真…真…真真真係好味到升起，尤其嗰舊‘拖羅’，入口溶化嘅肉質，徘徊口腔嘅鮮味，配上少少日本豉油，有般唔捨得吞落肚嘅矛盾，無得傾，十粒星！ 抱住‘少食多間’嘅戰略，之後去‘大和’，再去‘喜代村’，間間都好有水準，次次都要食拖羅，仲要係極肥無根，一舊幾十蚊（港紙），無奈，真係好好味，全部十粒星！ 卒之，幾百蚊（港紙）食個早餐，仲好似愈食愈肚餓，有點失控，下次再嚟築地，都係食定一排麵包打定底好啲！ 十二點離開，勇闖我指定必去朝聖嘅景點‘呯帶妙屍淫’（注*），山長水又遠搭火車去另一個縣，去到樓下先發現無咗個場，嗰刻真係霹靂火都嚟埋，胡胡聲咁離開… 老婆見我面濃濃揾人中，就提議去秋葉原，希望睇嘅嘢差唔多，有意外收獲啦。於是立刻睇旅遊書，轉戰秋葉原，沿路上我都谷住度氣，戰意高昴，衝呀！ 點半到秋葉原，嘩！正呀！好多玩具鋪，又多精品，一直馬不停蹄行行行，亂槍掃射買買買，直到六點半，收獲豐富到爆，因禍得福又一鐵証。 之後趕去上野買手信，因為出名嗰間鋪頭‘二木菓子’收七點，所以一去到就掃，最緊要手快呀！買完拎住一袋二袋，衝去車站租個Locker，中size四百日元兩個鐘，令我哋輕輕鬆鬆再去衝，爽！ 跟住行無印、綜合玩具雜貨店（六層高，好多Q車買呢），最後老婆想再試‘一蘭’麵家，今次點個湯再淡啲，一樣成碗連湯都飲埋，繼續九粒星。 十點拎住四袋五袋返酒店，執行李都執到成點鐘，爆晒喼，大獲啦！ 注* ‘呯帶妙屍淫’本為一處喜歡高達、超人、叮噹…必去嘅景點，後來先得知佢搬咗去另一達地方，為咗表示對白行一趟嘅不滿，決定唔用真名表示…但下次再去日本，一定勇闖呢個地方。 第八日，新宿（大都廳） - 新宿 - 機場 - 香港 趣事點滴： 亨李滿嚟到最後一日，有股誓要戰鬥到最後一刻嘅激情！ 朝早十點先起身，無食酒店早餐，盡最後努力，行多次新宿，喺車站商場食麵包食雪糕，之後就再逛Tokyo Hands，睇吓精品買吓手信，誓要射晒所有子彈，咩住兩支空槍返香港。 一點半由酒店搭車往機場，喺機場繼續買繼續食，直至日本時間五點三正式離開。 兩個廿幾kg嘅喼，兩個實心背狼，一個紙皮箱，兩個大紙袋…陪住兩個人，四五個眼袋，四隻行路震震吓嘅腳，返嚟香港，代表日本亨李滿正式結束，兩口子安全歸來。 總結：快樂無比，爭啲無錢返屋企！ **Upload咗啲相，假如看官你有時間無嘢做，請遊目一下，分享我哋嘅喜悅。 多謝！ 19 giugno 日本亨李滿 Part 3 of 4第五日，伊東 - 新宿 - 池袋 - 新宿（大都廳） 趣事點滴： 一早八點就食和式早餐，比強羅嗰餐更啱胃口，七粒星。 十點搭特急火車，一程過直達東京市，大約十二點半抵達新宿車站，即刻就地食個平靚麵，自助式買飛，大部份食客仲要企响度食，廿蚊港紙一碗，湯底靚麵彈牙，七粒星。 飽肚後先返Century Southern Tower Hotel攞番件行李，之後就拉住兩個大喼，快腳轉去另一間位於‘大都廳’嘅五星酒店Century Hyatt Hotel，安頓好就咩住兩排子彈，浩浩蕩蕩衝去掃掃掃… 中午兩點幾，先到池袋探吓路，第一站試食鋪頭出面掛有一隻巨鑊嘅‘無敵拉麵家’，呢間名店除咗要排隊，又要喺排隊期間點好菜，仲唔可以一碗兩份食，搞到我哋嘅‘少食多間’計劃即刻無用武之地，可惡！但話時話，啲麵同湯底又實在好好味，加埋有勁辣辣椒豉油，令我胃口大增，八粒星！ 之後就十萬里長征，行行行，先逛對面街一間細細百元店，作少少熱身所以無幫襯，跟住逛Uniqlo，喺嗰度連掃好多衫，同蘿蔔頭埋身肉搏啦！ 之後再掃 Tokyo Hands，啲錢繼續好似機關槍嘅子彈一樣，砰砰砰砰砰砰… 大約七點零，約咗公司同事（Cindy）喺Tokyo Hands門口等（佢哋一家咁啱又嚟日本，多家人多幾支搶，信心大增），碰面後兩家人交換情報之後就分頭行事，暫時各家自掃門前貨… 接近九點衝去餃子博物館，‘狂快急’咁試唔同餃子店嘅成名作，‘少食多間’計劃大派用場，臨關門食埋個印度雪糕埋齋，正宗飽到嘔唔願走，好鬼辛苦！ 十點幾跟Cindy一家衝去通宵營業嘅牛仔褲鋪頭，噢！有我最喜歡嘅‘李懷仕’，機關槍又要起動，砰砰砰砰砰砰… 午夜趕尾班電車返新宿，由車站行番酒店大約十五分鐘，沿途感到對腳已經超勁痺，瞓覺時仲抽吓抽吓，嗰種由腳板攰到上頭殼頂嘅痛苦真係難忘！ **相機無電解決！多得Cindy幫我由香港帶舊相機電過嚟，依家又可以狂影相啦。
趣事點滴： 朝早九點就食早餐，終於食番港式自助餐，親切感大增。 之後兵分兩路，老婆辦大事，我就衝去新宿電器城，幫朋友買鏡頭，可惜貴過預算又缺貨，所以白行一趟。但我就趁機玩吓啲單鏡反光機，噢！嗰下“塞打”聲真係好吸引，噤得多人都自信啲，有股化身水禾田嘅幻覺，不得了。 中午等埋老婆，商量之後，決定放棄行橫濱，勇闖原宿… 一到埗就近近地行史諾比專門店，老婆唔係佢粉絲都忍唔住掃咗幾件，如果係史諾比狂迷真係不得了。 跟住就輪到位於‘竹下通’嘅四層樓百元店，超多人（尤其香港人），個個講廣東話，好鬼似行緊日本城，加上新鮮感大減，匆匆行晒四層就離開。 去‘柿家胙’食回轉壽司，好港式亦好多遊客幫襯，但味道麻麻，要嚟坐吓放鬆吓對腳起OK，六粒星。 沿著‘竹下通’往前行，行到邊買到邊…戰利品包括介子一對，事源老婆覺得結婚介子好易帶到花晒，所以希望揾番對要嚟粗帶，咁啱揾到一對大家都喜歡，可遇不可求，買！ 夜晚七點約咗Cindy一家，加埋另一個好朋友（阿文）又去日本旅行，於是一行六人喺麥記集合，一齊去‘竹下通’某間專食吉列炸物嘅鋪頭食晚飯，吹吓水分享吓大家嘅旅遊情報，三對朋友喺日本相聚，好過癮！ 大約十點鐘與Cindy分手後，陪阿文去池袋行通宵營業嘅牛仔褲鋪頭，又一齊揾‘一蘭’麵家試食，通宵營業，食嘅時候好過癮，因為一個個隔開食，所以食到薯薯聲都唔驚，又係湯底靚麵彈牙，加上自己選擇加唔加蔥、辣唔辣、麵嘅硬度、湯嘅濃度，完全係度身訂做，老婆食到連湯都飲晒，好好味呀，九粒星！ 食完麵與阿文一家分手，經過藥房嗱嗱林買支按摩膏，臨瞓前實在要卒卒對腳，放鬆一吓，叉足電。 仲有兩日，老婆，努力，望到家鄉啦！ 待續… 15 giugno Happy Birthday to u...6/14 老婆生日了，禮物咪係我囉！
婚後首個大日子終於來臨，為咗要令老婆有個難忘嘅生晨，今日我就刻意決定…
一早返工時候送咭送札花，工作時間狂腥短訊，回顧過去日子嘅種種經歷，放工一齊走去 City Super 買兩塊牛扒，一盒雪糕，嗱嗱林返屋企，聽音樂飲紅酒煎牛扒，天黑就點蠟燭，大家亨一亨杯，清唱多首生日歌添…
以上又浪漫又飽肚嘅安排通通都唔做，日常過日常生活，連禮物都無份，爭啲連生日快樂都無講…
哈哈，面對咁刻薄嘅丈夫，咁平淡嘅生日，壽星女果然感到失望，火都嚟埋，往後年年攞嚟講，不知幾刻骨銘心！
用心良苦嘅安排，其實源於老婆病左，仲攞咗半日假返屋企休息，所以驚天動地嘅慶祝節目就遲啲先，等身體好番晒先狂歡！
生日快樂。
13 giugno I love my job...上星期五下晝响公司呆呆望海，頭頂突然一大舊黑雲飄過，之後就日日落大雨，永無寧日。
可能天氣影響，一班同事悶悶地，忽然興起玩‘畫鬼腳’，輸左就請飲下午茶，過程好刺激，咿嘩鬼叫，贏左既同事仲幸災樂禍勁串輸家，笑爆咀勁過隱，時間先過得快D，飲飽食飽之後咪收工囉！
*上得山多終遇虎，今日6/14輪到我輸左，依家仲俾人笑緊，火都嚟埋！
就係呢舊雲，搞到香港不停落大雨，日日要‘擔姐’返工，認住佢呀！ 08 giugno 日本亨李滿 Part 2 of 4第三日，新宿 - 箱根 - 強羅（入住季之湯雪月花嘅溫泉酒店） 趣事點滴： 一早趕去新宿車站買火車飛，卻喺車站裡迷咗路，足足遲咗成個鐘先搵到售票處… —到達強羅就即試唯一嘅拉麵館，店名唔記得，位處酒店隔離，質素尚算過得去，但無咩特別，六粒星。 之後決定買部‘即買即用菲林相機’，1400 Yen 39張相，唉！用住先啦！（後來發現便利店有得賣，仲係900 Yen咋，真係暈暈哋！） 酒店嘅設施十分正，除咗房間有獨立浸浴（風呂）之外，個厠塔有得洗pat pat之餘，仲有除臭功能，好體貼呢！ 戶外有幾間獨立嘅浸池（風呂），我哋當然無蝕底衝去試吓啦，一間獨立特色屋裡，兩個大瓷缸，啱晒我哋各自歎吓溫泉樂，喺大自然花草樹木之下，傾吓計潑吓水，悠然自得輕鬆寫意，若果有條藤喺度，我圍住條毛巾仲可以表演扮泰山添呀…呀呀呀，呀呀！ 浸池出面有免費益力多供應，唔洗錢梗係連隊幾支啦，補充體力呀嘛！ 晚飯喺酒店享受日本地道餐，十幾碟細細碟，但口味唔係全部都啱我哋，有幾種實在唔識欣賞，六粒星啦！ 第四日，強羅 - 箱根 - 伊豆（入住大和館） 趣事點滴： 一早喺酒店歎個和式超豐富早餐，食完嗱嗱聲衝上房再浸半個鐘，無蝕底呀嘛！ 十點就離開，搭火車往箱根，行個圈掃吓街，食咗碗手打烏冬，可惜鋪內煙味太重，食得唔多舒服，幾好味都係假，五粒星。之後行去街尾，火車站對面，試食好出名嘅‘菊池’雞蛋仔，熱辣辣軟綿綿，出乎意料咁好味，爭啲停唔到口，八粒星。 轉火車之後大約一點鐘抵達伊豆，入住‘大和館’，呢間好特別嘅旅館十足叮噹大雄住嘅屋，即是平時睇唔到床，要瞓覺先鋪床，又有一條地底隧道通往兩座大樓，好鬼過癮！ 晚飯要去另一間勁大嘅房間，得我哋兩個人不禁幻想如果有一大班朋友一齊食一齊玩，唱歌跳舞肯定開心到爆！今餐又食和式地道餐，但今次有原隻新鮮鮑魚，半隻腳板咁大，加少少上湯就咁用火燒，鮮味到不得了，八粒星！ 一食完飯就衝出去四圍逛，咁啱撞到有百貨公司兼有頂層100 Yen 店，唔洗講嘢，衝呀！掃呀！ 掃完一輪雜貨返旅館，攰攰哋又怕蝕底所以走去狂浸溫泉，加速陳新代謝順便叉足電，聽朝就要轉戰市中心東京，係龍係鳳就睇最後呢幾日啦！ 待續… 05 giugno 首次成功‘咇’嘢早兩日喺‘也who’bid 咗一套兩架絕咗版嘅車仔，今日相約賣家去地鐵站交易，順利買到心頭好之外，對網上拍賣亦改觀不少。
上年喺‘依悲’放玩具，有人 bid 咗卻約唔到買家，程序麻煩到爆，又呢又撈到最後又賣唔到，至此以後就怕咗網上做買賣，今次若果唔係發現到絕跡多時嘅特別版以超平價放售，可能到老都唔識喺網上 bid 嘢。
另一個意義當然係遲啲可以喺同一地方放玩具，一於賣得就賣…大個仔，要玩車啦！
一經成功，陸續有嚟，咇咇吓又咇咗幾架筍嘢，嘿嘿，又睇吓買賣順唔順利？ 04 giugno 五星級的家今日收到同樣係玩具儲物狂老友嘅一封依貓，噢！一睇實在令我心花怒放，羨慕不已…
全因相入面係每個儲物狂嘅五星級的家，一間房，一排大大個玻璃櫃，幾盞射燈，整整齊齊擺好啲心頭好，一層超合金，一層SIC，一層Q版車仔…耐唔時掃吓塵，執吓位，影吓相，不奕樂乎。
幻想之後，望吓新屋，依家都獲老婆分配電視櫃嘅其中一格，擺放呢期嘅新寵兒（Q版車仔），位置都幾好，向西南夠光猛，一尺乘一尺，後面一樣有玻璃…
總相信有朝一日啲珍藏可以破土而出，重見天日，但暫時仍要屈就吓，寄居床下底！ 01 giugno 新心頭好！忽然中毒，而且中毒好深，令財政緊拙，影響生活…
所指嘅係Q版回力車仔（Choro Q），可能因為做型太可愛，加上好多限定版出完就無，不但令其身價不斷上升，有好多仲有錢都買唔到！令我忽然愛上佢哋，四出搜羅，旺角灣仔葵芳荃灣大圍銅鑼灣太子，甚至日本嘅秋葉源同上野…總之有機會尋寶我都唔放過，一時間購入唔少心頭好，仲想賣玩具吐現，實行徹底移情別戀（哈哈！啲玩具危危乎矣）！
老婆有時都會潑吓冷水令我降降溫，不至失控係咁買，有佢喺身邊，真係定力大增！
…可惜我好多時都單獨四圍逛，所以呢幾日都流住血返屋企（銀包）！
日本官方網頁：
有結婚相睇啦！尋日放工攞到結婚相啦，七本相簿十幾斤重由北角拎到番大圍，真係膊頭都側埋！
睇番當日嘅片段，一幕幕場面又再浮現，開心快樂又感恩，仲覺時間過得好快，眨吓眼十幾日，結完婚渡完蜜月住埋一齊仲返埋工添，果真光陰似箭。
跟住就要俾雙方家人過目，睇相睇片、揀相、曬相、派相，我哋又要努力啦。
喺度分享當日一張我最最最鍾意嘅相，只能歎句，一眾兄弟實在太型啦！ |
|
|
