| Profilo di 斌多士斌多士FotoBlogElenchi |  Strumenti  Guida |
|
29 giugno 送妳一大盒鑽石又隱又瞞，之前買咗嘅鑽石（電話），尋晚終於攞到手，即晚鬼鬼鼠鼠叉電，今朝一起身就補送生日禮物…
以老婆嘅性格，又實際又唔追潮嘢，收到一刻都會雙眼一閃，叫咗一聲…「嘩！好靚呀！」
的確，部電話由外至內，由包裝到 hand free 機到叉機，我只能講句，實在太浮誇啦，真係無改錯名！
鑽石，從來都係女人嘅哥羅芳！
**特別鳴謝一位從事電訊業嘅好友，從中幫忙，讓我第一時間攞到部機。
**亦要多謝身邊知情老友們，過程幫忙保守秘密，辛苦晒呀。
28 giugno 歐國杯 四強戰 西班牙 3:0 俄羅斯四強階段另一場生死大戰，由鬥牛勇士西班牙，火拼機動戰士俄羅斯…
西班牙至今未輸過，惟一贏唔到嘅賽事，都係上場打和世界杯冠軍意大利，最後卻以十二碼淘汰對手，全隊士氣極為高昴；另一邊廂嘅俄羅斯有神奇教練領軍，球隊以整體合作，出色體能加上快速反擊，進級過程越打越好，上一場就以用不完嘅體力，喺加時下半場連入兩球，驚人地淘汰奪標大熱荷蘭…
此外，兩隊其實曾經喺分組實碰頭，當時未上力嘅俄羅斯以 1:4 輸比西班牙，今次仇人見面，俄羅斯當然希望擊敗對手，進級之餘又報番以前一敗之辱！
賽前預測兩隊不但士氣與狀態十分接近，仲會大打進攻足球，精彩程度可想而之…
比賽一開始，好明顯西班牙較為保守，對住機動戰士當然唔敢貿貿然進攻，心怕入波不成再輸特擊就大件事，所以頭十幾廿分鐘，俄羅斯控球時間多，組織攻勢亦較主動…
呢個形勢只係維持咗大約半個鐘，之後西班牙慢慢重拾比賽節奏，上腳時間漸漸增加，半場完嘅時候雖然打成平手，但其實西班牙已經慢慢醞釀進攻模式，仲有股後發先至嘅氣勢添…
果然，下半場西班牙加多兩錢肉緊，不斷組織攻勢，兩邊翼衛頻頻上前助攻，令進攻模式更立體，俄羅斯防守亦越見吃力，卒之，下半場 50 分鐘，兩名西班牙中場球員合力炮製入球，一個似射似交，一個快腳一督，領先 1:0 ，之後形勢不變，俄羅斯靈魂人物艾沙維全場被人釘人式緊身招呼，以至球隊未能暢順組織反擊，攻勢疲弱…
往後時間都係西班牙控制大局，仲喺比賽後半段連入兩球，領先到 3:0 ，直至球証吹雞完場，西班牙重演分組賽戰果，技術性擊倒俄羅斯，同樣又係贏 3 球！
歐國杯進入淘汰賽之後，呢場算係簡單直接分出勝負，雖然俄羅斯四強止步，但隊中 10 號仔艾沙維光芒四射，之後大把好球會等簽佢，另外，神奇教練希丁克嘅金漆招牌依然無打爛，神奇地帶親國家隊打大賽都入到四強…
強戰到此，最後舞台已經預備好，總決賽將由大賽球隊德國，迎戰不敗之師西班牙，戰術鬥技術，大戰一觸即發。
準備，6 月 29 日，歐洲國家杯冠軍即將誕生！
27 giugno 歐國杯 四強戰 德國 3:2 土耳其賽事去到最後四強，此時此刻，只要贏多一場就可以去到最後舞台，到時非冠即亞，唔係你喊就係我喊，所以大家嘅實力差距已經縮短得近乎半斤八兩，心理質素與應付壓力下比賽將成為取勝之匙。
今場由老狐狸德國，出戰神奇球隊土耳其，被喻為大賽球隊嘅德國，雖然進級路上不見驚喜，但大部份球員擁有出色嘅心理質素，有點大師風範；佢哋嘅對手土耳其，之前 3 場比賽都奇妙地後來居上，越近完場反擊力就越大，往往最後一刻入波而完全摧毀對手嘅鬥志，克羅地亞慘被淘汰就係代表作。
另外，土耳其因為球員受傷或停賽，今場得 14 人可用，場中 11 個搏緊命，旁邊都係得 3 個後備，全隊依然唔擔心無有怕，一副豁出去嘅態度，揸實拳頭衝得一場得一場！
於是乎，上半場開賽短短十幾分鐘，土耳其抱住唔怕輪嘅心情，場上每人走多幾步，大胆進攻全隊防守，竟然打出超水準，完全掌握比賽節奏，快慢交替，壓住德國嚟打…
15 分鐘，土耳其一次右邊策劃， 中場球員喺 K 角位交波俾後上嘅李察士衝射，彭一聲…皮球射中門眉應聲彈出，呢球波勁到用慢鏡重播依然飛咁快，雖然唔入，卻為德國隊上下響起警號， 你唔出力唔投入，隨時被神奇球隊擲出局，果然，幾分鐘後土耳其努力得到回報，先入一球，領先 1:0 ，德國呢個時候先醒，知道長此落去，隨時落後幾球返更衣室…
說時遲那時快，22 分鐘德國用一次簡單組織，憑住前鋒個人技術，快腳一卓入網，追平 1:1 ，只是，之後依然係土耳其嘅天下，進攻不斷，唔能夠增加入球實在可惜，最後半場打成平手 1:1 。
進入下半場， 土耳其刻意保留體力，讓德國推上啲，自己等機會打反擊，可惜，龍門一次犯錯，打手鎚撲空，被德國中鋒高路斯頂入，德國領先 2:1 ，神奇球隊土耳其又重演慣性嘅戲情，落後之下又漸近完場…
7 分鐘之後，全世界又再震驚多一次，土耳其竟在臨完場 4 分鐘追回一球，又平手 2:2 ，我心中呼叫，又打加時，唔係卦，神奇第四次！有無咁神奇呀？
卒之，剃人頭者人亦剃其頭，今次卻係對手臨天光入波，一次漂亮傳送，德國後衛那姆竟然喺最後一刻怒射入網，為德國喺法定時間解決神奇球隊，讓土耳其深深感受希望幻滅嘅傷痛。
結果德國喺驚濤駭浪之下進入最後決賽，而土耳其則雖敗尤榮，全世界都會記得佢哋憑住未到吹雞一刻唔服輸嘅作戰態度，打出連續幾場代表作，08 歐國杯神奇球隊當之無愧！
26 giugno 舊戲零舍好味最近揾到間 up dup 影視會，位于旺角勝利道附近，內裡竟然有大量舊戲，好多仲係絕版，其他地方買唔到租唔到…
於是即刻租咗幾套老戲番睇，你又識唔識佢哋呢？
24 giugno 歐國杯 八強戰 意大利 0:0 西班牙八強淘汰賽嚟到最後一場，由意大利硬拼西班牙，名牌對壘，實力之間充滿特色，各走極端…
意大利精於防守，而西班牙就勇於進攻，十足矛盾之戰；而且意大利佬大多高過西班牙仔成個頭，預料一隊會斬高波頂頭鎚，另一隊就以地面組織還擊；當然，仲要數兩隊都係以守門員做隊長，兩個都係世界頂尖龍門，保方惡鬥卡斯拿斯，兩隊都咁有性格，大戰就由吹雞一聲開始…
可惜，整個上半場兩隊都只係不停猜波，交嚟交去鬼咁小心，講得好聽啲就尋找機會，講得衰啲其實大家都怕死輸唔起，可能見到先前葡萄牙同荷蘭都無好下場，搞到兩隊都唔敢貿貿然進攻，變相得個悶字，最啱整個杯麵食，結果半場打和 0:0…
進入下半場，大家個身開始熱啦，進攻次數漸漸增加，當中不乏入波可能，可惜兩隊都把握唔到，之後嘅下半場 45 分鐘，連埋加時 30 分鐘都不分勝負，惟有再以最殘酷方式定生死，唔係你輸就係我輸…
呢個時刻，彷佛成為兩個隊長嘅對壘，最強龍門較量救十二碼嘅能力，好有睇頭！
兩位隊長各有千秋，企係度氣勢都唔同D，鋼門之氣從對手套散發而出，直逼四周，果然，頭四射意大利嘅保方救出一球，西班牙嘅卡斯拿斯仲勁，救出兩球，最後第五射，西班牙法比仔操刀，皮球噗一聲入網，全場震動，意大利黯然出局，西班牙奪得最後一席四強位置。
總結一下，四強分別由老狐狸德國對驚喜球隊土耳其，另一邊廂，擁神奇教練嘅俄羅斯對鬥牛勇士西班牙。
休息兩晚，星期四零晨先由德國與土耳其上場，期待繼續驚喜！
23 giugno 歐國杯 八強戰 荷蘭 1:3 俄羅斯八強進入第三場淘汰賽，頭兩場已經爆上爆，個個跌晒眼鏡，真係執到執唔切，今次輪到另一奪標大熱荷蘭出場，佢哋喺分組賽三戰全勝，贏晒法國同意大利，半力都贏羅馬路尼亞，三場入咗九球只失一球，以無敵姿態進級…
對手俄羅斯，以機動、體力化、反擊快速聞名、加上有個神奇教練「希丁克」在旁，雖然都算今次賽事嘅黑馬份子，但相比荷蘭，級數還是爭一點點，賽前預計有得打，但無得贏…
橙色全能足球，硬拼白色機動足球…
一開波就球來球往，兩隊大打進攻，荷蘭普遍球員腳法好啲，有組織有意識，俄羅斯球員亦不甘示弱，個個體力十足，十上十落全場跑不停，半場互無紀錄，下半場中段俄羅斯首先揾到機會，射入一球領先 1:0，往後時間荷蘭當然攻得就攻，機會一再出現，終於去到完場前 4 分鐘，禁區殺手雲佬射入一球，追平 1:1，我心諗，戲情莫非又一次峰回路轉，呢期後上一隊特別醒，唔通，荷蘭可以絕處逢生？
你點會預計到，勝負分野原來只在「體力」兩個字，比賽進入加時階段，荷蘭唔知係咪對射十二碼好有把握，還是根本跑唔郁，個個都散散哋等夠鐘吹雞，相反俄羅斯球員個個好似飲完 red blue，步頭一啲都無弱過，激戰咁耐仲可以不停遠射，廿幾三十碼彭彭聲次次近龍門，呢個時候，其實睇吓荷蘭可唔可以頂到完場架咋…
卒之，爆開又爆唔爭在爆多獲，俄羅斯喺加時下半場連入兩球，以 3:1 狠狠地淘汰荷蘭，昂然進入四強…
全世界又一次通地眼鏡，今次變晒全部橙色，爆冷溫床再唔係英格蘭足總杯嘅專稱，四年一次嘅歐國杯，今年八強已經場場驚喜，晚晚睇到 O 晒咀。
21 giugno 歐國杯 八強戰 克羅地亞 1:1 土耳其八強第二場淘汰賽，照計呢場波戲碼唔多強，無奪標大熱喺度可觀性大減…
比賽頭個 90 分鐘的確有啲悶，攻門次數不多，大部份時間都係中場搶截，睇到我呆呆滯滯。結果法定時間互無紀錄，比賽進入加時階段…
我心諗，土耳其上一場最後十分鐘連入三球，經典地以 3:2 淘汰捷克，個個球員殘鬼晒，今次無理由又過關卦！而且，進級後下場就對德國，土耳其？ no way 啦！
我有我諗但比賽唔會等，去到加時下半場，高潮開始湧現，先係克羅地亞喺 119 分鐘攻入一球，距離吹雞完場只有幾十秒，呢個時候領先 1:0，全世界甚至德國隊都認定克羅地亞可以進級，勇闖四強…
呢個時候，比賽進入最後倒數階段，但土耳其竟然全無放棄，繼續搶得就搶，湧得就湧，卒之…神奇球隊再一次震驚全世界，隊中 9 號仔竟然喺最後幾秒怒射入網，追成 1:1 ，天堂與地獄立即喺場上出現，克羅地亞球員嘅震驚，同土耳其球員嘅震奮形成超強烈對比…只是，你都未可以諗點解，球証已經吹雞完場…
加時打成 1:1 不分勝負，兩隊惟有用最最最殘酷嘅十二碼決定誰是四強份子。土耳其因為最後入波而士氣大震，全部射入，相反克羅地亞球員仍未能接受臨尾香嘅事實，個個球員混混愕愕之下，最後竟然三球不入，慘被神奇球隊淘汰出局，好幾個球員未能接受現實，當場豪哭，令人心都酸。
咁沉悶嘅對賽，竟然有咁戲劇性嘅結局，伍晃榮講得啱…
波…係圓嘅！
20 giugno 歐國杯 八強戰 德國 3:2 葡萄牙一踏入八強淘汰階段，第一場就爆個半冷，德國以嚴密防守，擊敗奪標大熱葡萄牙。
話之你葡萄牙有屍朗有籣尼有迪高，德國今場竟然成功打出獨有風格，即係有一球在手，全民防守，密麻麻塞晒喺自己禁區附近，迫得葡萄牙不斷外圍遠射，唯一嘅機會，就係射個世界波，可惜…
不禁令我想起籃球界一句名言：出色嘅進攻令你贏到比賽，但出色嘅防守先可以令你贏到冠軍！
莫非今屆歐國杯冠軍又學上屆希臘咁，以零犯錯奪標！？
無邊的思憶今日無啦啦不停打思憶，憶憶憶憶憶，憶成個幾鐘真係又煩又攰，一班同事見我咁辛苦，不停提供解憶秘技…
於是深呼吸、閉氣、狂飲水、唔好諗、曬太陽、散步、望遠嘢、吞軟糖、食香口膠、飲五談水不多不少…
唉！除咗頭頂敲飯碗同破地獄未試過之外，咩都做晒，但思憶依舊，真係無晒乎，正想扑暈自己之際…
隔離位同事忽然提議，用力禁實左手手臂中間位置，大約禁佢五分鐘，思憶自自然然消失…
噢！好神奇呀，禁咗三分鐘唔夠真係停咗無打思憶，我偷望一吓同事，嘩！一派世外高人嘅氣勢，都唔知係咪識放龜波氣功！
經此一役，下次打思憶唔洗搞咁多嘢，嗱嗱聲禁實隻左手，幾分鐘之後咪又一條好漢囉。 18 giugno 記憶有法今晚一家人出街食飯，席間阿媽分享呢排學緊記憶法，即係用唔同方法幫助記憶，有圖像法、故事法…
講得慶起，阿媽攞一本紙仔出嚟，足足一百張，每張寫咗一個數字同一件物品，佢話用咗圖像記憶法，只係花咗一個鐘就記晒每個數字同每件物品，叫我試吓抽問…
好神奇，我講一個號碼，阿媽就答一件物品，我講番一件物品，阿媽又可以答番一個號碼，全部啱晒，雖然數字同物品無尼啦更九唔答八，但對一個六十幾歲嘅媽媽可以記得晒，睇得出佢不知幾開心，自信番晒嚟。
細佬一貫不俏嘅態度，覺得阿媽無事攞事嚟做，寧願睇電視都費時理我哋…
我卻覺得，唔同年紀有唔同需要，以前阿媽成日被人話「無記性」，難得今次嘅記憶法令佢增加自信，仲分分鐘叻過啲後生…
唸落，都幾好吖！
16 giugno 出省食好嘢今日攞假同老婆補慶生日，兩口子一早執拾行裝，攞相機風褸 NDS ，決定去遠行散吓心叉吓電，十點出門，過海，去香港玩！
目的地係中環籣桂坊一帶，目標係三間出名食店，決要「食好啲」！
第一間係「陸羽茶室」，試吓啲茶（的確幾好，老婆都話正），仲有上湯煎粉果，唔錯，可惜貴咗啲！
第二間係附近嘅「九記牛腩」，摸咗幾次門釘，今日終於試到喇，仲係唔洗等位直上二樓，啲尹麵同咖哩汁的確名不虛傳，但我最鍾意都係個湯底，一試難忘。雖然咁正，但價錢都貴架，咖哩牛腩，尹麵另上，淨河粉，盛惠六十九元！
最後一間喺「九記」對面嘅大排檔，名叫「勝香園」，在場個個都食嘅蕃茄麵，仲有奶油脆脆，無得頂呀，相比之前，呢間確實又平又正，啱晒草根。
食完再逛逛「九記」旁邊嘅家品店，真開心，令我好想有自己嘅屋，可以粉飾一番。
大半日旅行五點結束，趁啲人未放工我哋就返到屋企，仲一入門口出面就落大雨，實在好彩。 09 giugno 雨後陽光早前不停落雨，搞到日日姐不離身，衫褲鞋襪褲腳例湯濕立立，既狼狽又唔舒服…
屈屈七日之後…
今日，久違嘅太陽終於出現，令我心情開朗番晒，走落街唔洗擔姐左閃右避，跳吓跳吓人都瀟灑啲。
|
|
|
