| Profilo di 斌多士斌多士FotoBlogElenchi |  Strumenti  Guida |
|
27 giugno 1958-2009 Michael Jackson2009-6-25，一夥超級巨星殞落，Michael Jackson 突然不支倒地，King of Pop 猝逝！
一代舞王，在台上散發着懾人魅力，一舉手一踢腿一挺胸一低頭都令人目瞪口呆，舞步彷佛溶化入音樂同節奏當中，令觀眾如痴如醉，所以人人記得 Moonwalk，我卻不能忘記佢喺 92 年嘅演唱會上，一記直身前傾 45 度再回身，到依家番睇都仲要大嗌：有乜可能咁勁！
呢個世界有天材，更不能否認佢哋充滿天份，所以有拳王、有球王、又有貓王、仲有馬王！
個個都咁利害，仲要可一不可再。每個離開都讓人婉惜，彷佛一定後無來者…
呢晚我都懷念一吓 MJ ，上網睇番佢啲跳舞片段，追憶一吓…
至於傷心，當年家駒身亡先最傷心呢！ 24 giugno 白頭髮細個無零用錢，最鍾意就係懶乖幫阿媽‘蚊’白頭髮，‘蚊’到有賞，一兩毫子一條，一晚金睛火眼左揀右揀，收入都有十元八塊！
光陰似箭角色轉變，依家輪到我白髮斑斑，多都唔緊要，最衰就係佢哋實在好串，成日要零零舍舍一條 ‘動 L’ 彈起，照鏡時好似對住我激昂大叫：我姓白，你吹得我漲咩！
所以，我耐唔耐都會叫老婆出手，清走啲害群之馬，無錢收之餘仲一定要剪，千祈唔好‘蚊’，因為啲婆仔話會一開三，又話會刺激頭皮…
早前嚟一次雷霆掃穴，老婆巢吓剪吓，眨眼已經屍橫遍野，當中發現新種白髮，叫我目瞪口呆！
21 giugno 2009-6-21 父親節今日父親節，身邊好多結咗婚嘅朋友都相繼升尼，由丈夫登上父親寶坐，眼見佢哋高舉 BB 嘅時候 ，責任感與承擔散發四周，令我不禁肅然立正，敬禮吶喊：實在係好父親！
回想一吓，由我兒時到依家短短三十年，父親角色演變得彷似反轉再反轉，上一代啲老豆絕不可能如此體貼溫柔，更何況向老婆仔女傾心吐意表達自己！
所以，20 世紀啲細路嘅幸福指數一樣升尼，事關你哋一定聽到阿爸嘅心聲與期望，只要咪索 K ！
最後，還是要為上一代啲父親敬個禮，你哋身處生活艱難嘅時代，拼搏養家，有苦自己知！
父親節快樂。
 17 giugno 急救課程最近公司安排聖約翰救護機構到來，舉辦急救證書課程，一連四星期，每星期一堂，學吓急救知識，之後若果考試合格，仲會有證書一張呢！
因為唔洗錢，所以報名擁躍，我同老婆都有參加，一大班人柴哇哇，笑笑吓一堂玩玩吓又一堂！
今日已經上到第三堂，正正學到心肺復甦法（亦即心外壓，坊間叫人工呼吸），一班傻人雞手鴨腳，對住金髮女郎公仔，又要咀又要壓，睇人做嘅時候覺得惹笑又滑稽，到自己實習先發現一啲都唔容易，步驟錯晒手勢又唔好，有時用力吹完個金髮女郎竟然毫無反應，阿 sir 話呢啲叫做…吹佢唔漲！
流血不止、燒傷燙傷、骨折包紥、不省人事、中毒出血…學晒咁多急救方法！
下次見有人爆晒江斷晒骨仲嘔緊血，我定會衝過去，同佢美言幾句：「放心呀，我識急救，依家幫你報警叫救傷車，頂住咪死呀…」
落手救人？…等我返屋企攞筆記睇吓先！ 14 giugno 614, Happy Birthday老婆又年長一歲，沒有驚天動地大爆炸兔女郎彈出稜空打根斗抱膝落地單眼 say Hi ，卻有一班大小朋友依嘩鬼叫嘈喧包閉支支揸揸陪伴天光玩到天黑，好開心呢！
老友們的祝福：
雖然今日去唔到“海洋公園”，多謝你 open 你嘅屋企，等我哋“大大”“細細”都可以陪你大半日，食吓卡樂 B 再慶埋生日！簡簡單單又一日兼又一個生日！祝你日日都咁開心，斌記日日都咁體貼！靈命好似火箭咁升啦！送你一罐 NewZealand 蜜糖，希望幫你驅風止頭痛啦！主內…（多多+力+謙謙）
生日快樂呀！大個女喇，遲啲仲老呀！所以要‘有仔趁嫩生’，快啲加入我哋嘅 BB 戰團啦！祝日日快樂，同老公甜甜蜜蜜！！YEAH！（May+蕉+悅晴）
壽星女，墨水你就有大把喇，情趣呢…你就要加把勁學習吓，下年生日唔好喺屋企過喇，不如每年生日去旅行，或食餐好嘅都唔錯…似乎講緊我生日願望多啲，哈！（Chris Wong+Ka Yan）
壽星女，生日快樂呀！3X 歲的女人最有女人味，亦是最幸福的。希望你繼續擁有純真的心，相信你在我的朋友黨羽中，依然是最最單純可愛的，哈哈！祝你和老公開心、甜蜜，滿有主恩！（Sue+Adrian）
壽星女，生日快樂，欣賞你的熱心，生日都帶圖書部圖書返家做手工…繼續努力…（歐琪+Eric+佩佩）
  11 giugno 食好嘢最近食過兩處好嘢，值得推介…
1. 坑口村大排檔
天時暑熱叫幾道勁惹味小炒，千層咕嚕肉、老干媽炸大腸、南瓜烙、黑椒牛仔骨、蟹肉韮菜花煎蛋…食到標晒汗嘅時候，飲啖冰凍啤酒或可樂，好似冰山溶雪衝落溶岩一樣，沙…爽死！（尤其要試老干媽炸大腸，又辣又脆，食到火到嚟埋！）
2. 尖沙咀（松屋） 三小時任食串燒同魚生，不得了，燒牛脷、雞亦、雞軟骨、雞亦餃子、天婦羅蝦…仲有綠茶啤酒一樣任飲，生咗兩粒大飛滋都唔理得咁多，痛到登衡腳趾都要喪隊，過程令我失按讓我痛，仲邊食邊流眼水。（尤其要掃雞亦餃子，記住連皮食呀！） 噢！諗番起都有啲肚餓！
03 giugno 未來戰士的來龍去脈知道身邊有好多朋友（包括我自己）已經準備睇未來戰士 2018 ，入場之前，不如回顧一吓未來戰士嘅故事與世界觀…
1984 年第一集：
故事發生喺 1997 年，超級電腦「天網」作反，大舉消滅人類，謹存者絕地頑抗，戰爭期間人類一方出現咗領袖「尊康納」，帶領反抗軍與「天網」周旋，漸漸反敗為勝…
於是，「天網」喺 2029 年派出「殲滅者」機械人，亦即是大隻佬阿諾，穿越時空，回到 1984 年，要在「尊康納」未出世前殺死佢媽媽「莎拉康納」，改變歷史…
同時，人類一方亦派出戰士「卡里斯」，一樣回到 1984 年，拼死保護「莎拉康納」…
雖然最後「卡里斯」犧牲，但總算完成保護「莎拉康納」嘅任務，無俾「殲滅者」殺死…
過程中更與「莎拉康納」心生情緣，一夜風流之後，令 「莎拉康納」有咗 BB ，亦即未來嘅「尊康納」。
1991 年第二集：
首次阻殺任務失敗之後，「天網」再次派出機械人 T-1000 ，一部可以液化嘅新型機械人，今次回到 1995 年，誓要殺死少年「尊康納」…
人類一方立即派出救兵，今次竟然係上集「殲滅者」機械人（阿諾），回到 1995 年，與「莎拉康納」聯手對付 T-1000…
最後邪不能勝正，「殲滅者」阿諾更與 T-1000 同歸於盡。
2003 年第三集：
接連失敗之後，「天網」於 2032 年派出更新型機械人 T-X （女裝！），今次回到「尊康納」青年時期，同樣執行殺人任務…
「殲滅者」機械人（阿諾）再次回去救駕，更在過程中，喚醒青年「尊康納」嘅信心，往後日子誓要保護人類，與「天網」對抗。
 |
|
|
