去到最後一戰，由西班牙硬碰德國…

 

不敗之師西班牙，之前打過 5 場比賽，攻入 11 球只失 3 球，無論士氣同狀態都處於巔峰，每個球員都極渴望取得勝利，目標一致，所以一落場就拚搏十足，盡顯強隊風範…

 

但看似完美嘅球隊一樣有弱點，就係歷史包袱，被預為大賽超黑馬嘅西班牙，參加咁多大型賽事，每次賽前一定被人看好，但每次總是失望而回，對上一次攞到大型賽事嘅冠軍，正正就係歐國杯，不過已經要追溯到 44 年前，即係 1964 年，所以西班牙可否放開懷抱，順利打出自己嘅風格與隊型，將會成為致勝關鍵！

 

另一邊廂嘅德國，由分組賽至今，無霸氣無射手甚至無入過金球，更加輸過比克羅地亞，有人話德國入到最後決賽全因為條戰線好易打，話雖如此，佢哋都打過兩場代表作，分別贏大熱葡萄牙同神奇球隊土耳其，今屆又入決賽，你不能否認，佢哋真係大賽球隊…

 

西班牙要打破 44 年無緣冠軍嘅宿命，德國都有宿命要破，被喻為新凱撒大帝嘅隊長波歷克，至今已經攞咗 12 個亞軍，即是話佢無論隊會定國家隊，成日都可以打入決賽，但次次都敗仗而回，每次都攞住亞軍獎牌企喺旁邊同人助興，波歷克對冠軍嘅渴求，應該去到失控嘅地步，所以德國隊中以佢為馬首是瞻，誓破二奶仔宿命，搶都要搶個冠軍返老家。

 

賽前各有各故事，但球証雞聲一響， 2008 歐國杯總決賽正式開始…

 

一開波德國好快就入局，無論組織定控球時間都比西班牙多，好有決心，以至西班牙後防有點混亂，顧得防務自然影響進攻，所以形勢以德國較好，但情形只維持咗十零分鐘，西班牙開始掌握比賽節奏，控球慚慚增加，後防不單頂得住德國嘅攻勢，仲無慌無亂，截到皮球唔會亂咁大腳踢走，慢慢組織攻勢，由後場傳上中場再交俾前鋒進攻， 20 分鐘西班牙王子托利斯搶點成功，遙頭一頂，僅僅撞柱不入，當時形勢已經慚慚去咗西班牙一邊啦…