七月廿二日，百年一遇嘅日偏食係 8:15 - 9:25 向香港東方上空出現…

 

咁難得嘅盛事當然要八卦感受一，於是返到公司，就啱時間，揸架車去 canteen 食早餐，沿路發覺天色慢慢變暗，有啲似人手較暗啲燈…

 

抬高頭用肉眼嘗試望吓個太陽，快立幾眼乜都睇唔到，對眼仲痛到飛起…

 

後嚟同事教用藍色透明快佬隔住雙眼，就可以舒舒服服欣賞日食奇景，你都咪話，個太陽好似變成一個發光的月亮，真係好奇妙！

 

  隔離碼頭啲人用磁碟睇，效果一樣咁靚。

 

七月廿三日，全年大暑，氣溫彷佛真係高幾度…

 

我懶型下晝落街跑步，跑兩跑已經垂晒手，沿途反眼伸晒脷，辛苦到不得了，更感受到燒賣喺蒸籠入面嘅心情，每吋皮膚都燒焦，出嘅汗都臭啲！

 

颱風 “莫拉菲” 急步湧至，正面吹襲香港，一如所料，天文台昨晚十一點半就忍唔住掛八號風球…

 

零晨時份 “莫拉菲” 加多兩錢肉緊，兜口兜面橫過香港，風急雨狂，天文台決定將警號升級，九號風球高高掛！

 

當時我望住窗外，雨水扒扒聲，D 風就蓬蓬聲，氣氛令人緊張，好似將會有大怪獸出現一樣…

 

望兩望昏昏欲睡，睇外面橫風橫雨，心諗聽日起碼晏晝先落波，今晚一於發個好夢，雨中打怪獸…

 

誰不知七點起身，驚見外面風平浪靜又光殘殘，開電視見左上角竟然得番個 3 字，咁快落波，實在不能相信…

 

可惡！你個 “莫拉菲” 有頭威無尾陣，咁快就無以為繼，真係無料到！

 

 “莫拉菲” ，拜拜你條尾！

 

零九年首個八號風球好可能今明發生！

 

颱風 “莫拉菲” 非常接近香港掠過，落多D腳趾公西好可能中到正，所以天文台預測，18 號下午上三號，19 號清晨時分有機會上埋八號添！

 

可惜我工作於貨運業，仲係風後重災居貨櫃碼頭，所以，俾人鬧都係咁話…

 

唔好打風呀！

 

 

 

話口未完，個風就轉，中午兩點天文台改掛三號風球。

 

貨櫃碼頭立刻作出應對措施，旁晚五點停止吉櫃交收，七點停埋重櫃…

 

眼見 D 躉船瘋湧衝埋碼頭，誓要打大風前完成工作，拿拿聲柄埋避風…

 

我望住個海，有 D 似打杖搶灘，心裡騰騰，風前風後大把做呀！

 

 

七月十六日至廿一日，教會一班青少年人去到四川，探訪當地嘅兒童，喺災難之後關心支持，互相學習…

 

老婆有份參與其中，親身上陣，尋日一個喼一個背囊，浩浩蕩蕩隨隊出發，當中仲會去到重災區‘都江堰’，相信經歷一定豐富，感受一定深刻…

 

我身在香港，擔心梗有啲，肉體又無得出力，惟有心裡努力禱告支持…

 

弟兄姊妹們，加油呀。

一個月時間，上咗幾堂全日急救課，學習應變常識、止血打包、人工呼吸…

 

尋日終於考試啦！

 

一大班同事無論咩職位咩等級，都專心備戰，不斷練習，態度認真，實在值得欣賞…

 

考試前幾個鐘，好多準考生已經預早到咗試場作最後衝刺，時間越接近，心跳越快速，緊張過見到真傷者！

 

考試分三部份，先考筆試，難度唔高，只要唔係玩嘢，應該無問題。之後就考動作環節，包扎與 CPR （心肺復蘇法），我同老婆為一組，總算抽得好籤，CPR 做 BB  仔，包扎亦唔係超複雜過案，所以過程順利，無乜大甩漏。

 

考完之後等消息，希望兩個星期後平平安安合格，維園阿伯都識講…

 

要救人，先要救自己！

 

 老婆勇字行頭，第一個衝去考 CPR：「現場環境安全…BB, BB, 咩事呀…」

幾年前西班牙出現咗一個瘋狂主席，名叫佩雷斯，佢提倡一隊球隊嘅技術、戰術、合作性都係次要，最緊要係卡士，所以實行一年一星政策，即每年重金禮聘世界一級球星加盟，當年就砌出一隊星光嘅銀河艦隊，有施丹、費高、朗拿度、碧咸、奧雲…真係唔打得都嚇得！

 

之後瘋狂佩雷斯離開咗幾年，銀河艦隊解體，超級球星走嘅走，退休嘅退休，無尼神氣之下，2008-2009 聯賽冠軍都輸埋比巴塞，對於有錢有面嘅皇馬，都算衰到貼地…

 

於是，瘋狂佩雷斯再次出山，無人爭之下又當上皇馬主席，佢一上場就斬釘截鐵，重重咁許下諾言，買買買，一年一星都嫌佢慢，老虎都要一年 all 星，誓要重組銀河艦隊，追番過去幾年所失去嘅…

 

就係咁，海嘯一樣嘅癲狂巨浪由西班牙爆發，直捲全球，先買卡卡（6500 萬磅），再買 C 朗（8000 萬磅），跟住到艾比奧爾（1500 萬磅），啱啱又買埋賓施馬（3500 萬磅）…嚟緊可能仲有韋拿、列貝利、艾比路亞、沙比阿朗素…

 

打機就有金手指啫，估唔到現實世界竟然有無限金錢，瘋狂佩雷斯演繹得真夠徹底，買買買買買，錢唔係問題，只要你肯制，唔怕沉就埋嚟啦！

 

2009 銀河艦隊最後到底係咩陣容，就放長雙眼睇吧！

唔知係因為假期揾節目，定還是呢期無咩戲揀，一套“變形金剛 2 ”好似非睇不可，幾經撲飛之下，今日終於入場欣賞…

 

老老實實，經過“未來戰士 2018”同“星空奇遇記”之後，今日再睇呢類科幻特技動作片，過程真係飽飽滯滯胃口收細！

 

感覺有啲似幾個月前喪食雲吞麵，嗰日之後聞到鹼水味都驚，到依家都未食過雲吞麵，講你都唔信！

 

講番狂派再起，佢又唔係一無是處嘅，起碼睇到依家啲電腦 CG 技術已經去到‘沒有不可能’嘅地步，所以無論飛越金字塔、擊沉航空母艦、啲高樓大廈呢度冧嗰度爆…你諗得出，電腦就做得到。可惜，兩個鐘頭片長入面不斷轉不斷冧不斷爆不斷飛，你無暇諗發生咩事已經跳去下一個場景，似唔似用水喉直接泵啲麵入你個胃，你唔洗諗亦唔洗趙，直到你滿瀉為止…

 

再講，變形金剛主要講機械人，睇完上集都知鬼佬機械人不堪入目，今隻仲要講嘢個咀會郁，發神經嘅時候連眼淚同鼻涕都有得噴出嚟，你話係咪走火入魔！

 

另外，到啲機械人變身一環，唉！我真係無嘢好講，但可以介紹一個小玩意表達呢種精密嘅變身過程…

 

只要你手揸一舊磁石，掟埋去啲釘書釘呀、萬字夾呀，無九成都七成似，精密變身咪就係一路滾一路黐晒啲嘢上身，加埋聲效 LLLLLLL，屙拍民出現！

 

如此排山倒海浪接浪嘅特技科幻片，坐我附近都有一個朋友睇到嘩嘩聲，不過佢得四五歲！