今晚喺旺角信和中心被人扒咗銀包， 當見到背狼打開咗，銀包不翼而飛，嗰刻真係六神無主，激動、憤怒、自責、徬徨…總之就不能面對現實，身體由頭到背再到腳不停標汗，拉緊咗嘅雙手狂扯頭髮，好似要撕碎自己一樣…

 

不能面對，惟有沿路行番信和，睇吓啲垃圾桶，希望有機會執番無晒錢嘅銀包…可能因為太憤怒，覺得信和入面啲人個個賊眉賊眼，無個好人，全部都有可疑，好想時間停頓，逐個俾我搜書包！

 

大海撈針當然徒勞無功，之後仲要行鬼咁遠先去到旺角差館報失，原來依家差館都要攞飛排隊，三個櫃位得一個警察辦公，等足半個鐘先輪到我，埋到櫃枱眼見一個又肥又眼細嘅差佬，講嘢鬼咁細聲，句句都要講兩次我先聽到，真係火到嚟埋，唔知以為肥差好盡責，得番幾啖氣仲堅持要當更…

 

被肥差糟質一輪，立刻趕番屋企（身上得幾蚊搭火車），狂打電話報失信用咭、提款咭、補領身份證、車牌、學生證…越打就越唔開心，因為當中嘅自動轉賬，網上登記全部要做過晒，真係煩到頂出煙！

 

好日都唔袋咁多錢、仲有證件信用咭提款咭、加埋幾張好有紀念價值嘅相、一啲私人 notes …

一下子無晒，唸極都唸唔明，點解要係我，點解呀！

 

我頂！

 

 一日兩兄弟與幾個朋友仔响後樓梯發現咗一隻青蛙，好大隻好樣衰，啲皮凹凹凸凸好似有毒一樣…

 

超初大家都係吐吓口水、揾石仔碇吓佢，揾人字拖拍地下嚇隻青蛙跳去另一邊，過程依嘩鬼叫哈哈笑，已經夠開心，玩玩吓唔知邊個揾嚟一個竹筲箕，一嘢就凹住隻垂死嘅青蛙，呢個時候有人就提議玩火燒…

 

於是大家彭彭聲攞啲火酒火水天拿水，倒晒落個竹筲箕（內有青蛙），之後一點火，熊熊熊…！烈火一燒就幾分鐘，直至竹筲箕完全燒晒啲火先停落嚟，跟住大家撥開啲煙…

 

噢！嘩！…

 

驚見剛才隻青蛙燒到發漲咗幾倍，令立立漲卜卜，好似 Q 隻版塑膠玩具一樣。

 

…就喺大家唸住無嘢玩散水嘅時候，大仔回身一腳踩落去隻發漲青蛙度…

 

唦…！

 

成隻青蛙碎晒，好似腳踏薯片一樣！

考試先嚟打八號，要改期再考，真係禍福難料…

 

**唸番起細細個最希望就係考試測驗默書撞正打風，卻從未試過咁啱得啱橋，次次都難逃劫數，都算係求學時期一個遺撼。

屋邨嘅細路仔總係好想養寵物，兩兄弟都唔例外，可惜阿爸阿媽嚴禁養貓養狗養雞養鴨，苦無機會嘅兩兄弟一直等待，直至… 

 

某一年一個落住大雨嘅下晝，兩兄弟喺樓下玩嘅時候，發現兩隻剛開眼嘅小老鼠，眼大大全身灰白色吱吱叫，半隻手掌咁大好鬼可愛，一人一隻抱上手唔捨得放，心裡有種兄弟重逢嘅奇妙感覺，歡天喜地於是決定攞返屋企收養。

 

呢下當然要秘密進行啦，兩兄弟靜雞雞，喺屋企嘅床下底啲雜物後面揾個鞋盒收埋呢對小老鼠，得閒就攞啲冷飯菜汁餵佢哋，耐唔耐就傾吓計講吓心事，一時間床下底變得既溫馨又熱鬧…

 

快樂嘅時光過得特別快，一日兩兄弟發現個鞋盒空空如也，唔見咗小兄弟嘅兩兄弟鬼咁擔心，但四圍揾都唔見，就以為佢哋有毛有翼遠走高飛，無可奈可惟有不了了之…

 

誰不知過咗無耐，阿媽一日朝早忽然大叫，話見到有大老鼠喺屋企出現，之後更發現組合櫃、門框、垃圾桶、梳化…通通被嘢咬欄咗，阿媽問兩兄弟有無見到老鼠，兩兄弟當然炸唔知話無啦，卻心裡暗暗歡喜“太好啦，佢哋健健康康咁長大咗呀！”

 

第二晚，因為阿媽實在太驚，於是瞓之前搵嚟一塊木板，一尺乘一尺，中間放一塊乾魷魚，四周搽滿晒老鼠膠，放响廚房灶頭底，誓要滅鼠行動！

 

朝早大家望見嗰塊木板都嚇咗一跳，因為當中竟然有三隻老鼠，兩隻大碼一隻中碼，全部被老鼠膠黐實晒，幾經掙紮死咗兩隻，一隻垂死…

 

之後阿媽再無見到老鼠，件事好似告一段落…

 

惟獨兩兄弟心裡有數！

 

呢排與老婆逛超市，有個特別節目都幾好玩，就係鬥揀靚橙，十蚊四個橙一人揀一雙，睇吓邊個揀嘅橙又甜又多汁…

 

唔知點解，次次都係老婆揀嘅好味啲甜啲多汁啲，我揀嗰啲唔係鬼咁酸就係超乾爽，無晒水嘅橙好鬼難頂，食完仲口渴過未食，死未…！

 

真係唔明，我已經揀啲又大又重又鮮色，到底揀靚橙嘅秘訣係咩呢？

今日又喺網上睇到另一玩具狂迷嘅屋企，個玻璃櫃又一次令我神魂癲倒，但呢次心跳得更利害，因為裡面嘅收藏品正正係我僅餘嘅至愛…

 

全套懞面超人頭像與 S.I.C...

 

噢！我暈啦！！！！！

今日股市大跌，個個嘩嘩大叫，猛嗌話要搵葵涌區最高嘅建築物跳落嚟咁話，好似好傷喎…

 

我都一樣，啱啱學人買吓股票，轉頭就見股價直插而下…

 

有點搭沉船嘅味道！