10:30 am

 

決戰日子終於來臨，起身梳吓洗吓，對住塊鏡喃喃自語「忍辱五年，就係等今日！」之後檢查一下，學生證準考證身份證……好！出發吧！

 

音樂隨隨響起…「昂然踏着前路去，追趕理想旅途上…」

 

12:30 pm

 

返到學校嘅自修室，作臨別一 hae ，輕鬆複習，順便感受平時忽略嘅事物，一枱一凳，光管插蘇，彷佛逐一話別。之後去 canteen ，坐喺中央飲杯凍央，認真聽聽平時煩到爆嘅大堂音樂，噢，心情影響聽覺力，原來都幾好 feel 噃。

 

4:00 pm

 

望望筆袋，原子筆間尺螢光筆白油擦子膠…全部已經磨拳擦掌，一股作氣，靜靜等待主帥鳴雞出兵……好！上路吧！

 

音樂再次響起…「昂然踏着前路去，追趕理想旅途上…」

 

試場地點喺筲箕灣，沿路我心裡一直嚕囌，有無搞鬼錯，編到我去無雷公咁遠考，搭地鐵都搭到半死，下次不如編我去大嶼山吖笨…「吐吐，無下次無下次，真係大吉利事」

 

6:30 pm 

 

準時開卷，直做三個鐘，9:30 pm 離場，邊行邊聽到某個考生細聲講「唉！都唔知自己寫乜，好擔心…」我低低頭陰陰咀，心裡祝福吓佢「唔緊要啦同學，衰咗咪再考過囉，所謂年年 repeat 易過搭lift，我喺出面為你打氣…」

 

9:45 pm

 

斗斗步出試場，天都黑晒，我拳頭緊握，低沉聲音由牙罅唧出嚟…「嘿嘿，我終於自由啦，聽日開始，我要攞番呢幾年所失去嘅嘢！嘿嘿…」

 

後面位同學推推我…「喂！唔該借借！」

多少次，身邊朋友歡天喜地走去踢波，我卻扁晒咀喺學校附近踢石仔…

 

尋晚臨瞓左眼忽然痛痛哋，半個鐘後惡化到連貶眼都痛，眼皮低下腫起上嚟，莫名奇妙，諗住食粒止痛藥，瞓醒先算…

 

今朝起身，左眼已經腫到只能開三分一，又痛又痕，不停流眼水，望到鏡中嘅自己先識驚，大細超得好樣衰！

 

中午嗱嗱聲睇醫生，當時左邊臉已經變成咸蛋超人，苦不湛言，佢望吓我嗰怪相，撩吓禁吓隻左眼，診斷我為「眼膜炎」，俾咗支眼藥水同藥膏，吩咐我要定時處理…

 

返到公司諗住快啲變番地球人，第一時間走去滴眼藥水，點知嗰時先發覺，原來自己完全無呢方面嘅經驗…

 

入到厠所坳晒腰，攞住支藥水，凌空對住隻眼，由遠而近，控到鬼咁埋搞到不停貶眼，惟有咬實牙根強行撐大眼皮，瞳孔收縮，深呼吸之後閉氣，右手大力一禁，藥水一出…滴…

 

滴咗落眼袋度！…頂