| 斌多士's profile斌多士PhotosBlogLists |  Tools  Help |
|
November 10 黑暗期實在莫明奇妙，踏入 09 年嘅利記，忽然進入史無前例嘅低潮期，無論聯賽定盃賽，不停失分不停輸波…
最慘仲係全隊彷佛中咗魔咒一樣，頭頭碰着黑，每次意外都係損失，不停影響士氣…
2009-8-16 作客熱刺，兩名後衛救波相撞，一個爆頭一個爆鼻，最後輸 1:2 ，亦為後防狀態響起警號。
2009-8-25 主場對維拉，竟然輸 1:3 ，當中輸一個烏龍波，一個角球同一個十二碼，即係全部輸死球，賽後區域聯防被人猛烈評擊。
8 月總結，打四場，贏兩場輸兩場。
9 月，總算有點點反彈，打六場，贏五場輸一場，依然無和波，可惜惟一敗仗，係歐聯作客輸俾費倫天拿 1:2 。
進入黑色十月…
2009-10-17 作客新特蘭，輸 0:1 ，輸在有利記球迷掟個沙灘波入場，而新特蘭前鋒射門，竟然省中個沙灘波改變方向入網，慘絕，亦成為大笑話！
2009-10-21 主場對里昂，歐聯第三場比賽，利記當時只得三分，實在不容有失，上半場有喜有悲，喜嘅係領先 1:0 ，而悲嘅就係隊長謝拉特因場提早離場，下半場利記久攻不入，仲喺 72 分鐘被里昂追成平手，打成 1:1 ，滿以為各得 1 分，誰不知加時階段，去到 91 分鐘，里昂再入一玩，利記由贏變和，再由和變輸，痛失 3 分。
2009-10-31 作客富咸，輸 1:3 ，當中利記有兩個後衛紅牌被趕出場，往後賽程後防更缺人用！
踏入十一月，黑氣未散…
2009-11-4 作客里昂，歐聯第四場比賽，利記之前失分太多，今場要拼盡，許勝不許和，83 分鐘，利記終於攻入一球，領先 1:0 ，仲有幾分鐘就完場，點知踏正 90 分鐘，利記後衛唔能夠清脆解圍，被里昂射入，打成 1:1 ，又最後痛失 2 分。
2009-11-10 主場對伯明瀚城，利記急需勝仗振奮士氣，擺脫陰霾，於是全場猛攻，不停射門，16 分鐘有個好開始，利記前鋒一招半車身射門，攻入第一球，領先 1:0 ，之後繼續主攻，希望盡快入到第二球，但天有不測，伯明瀚城一個罰球斬入禁區，利記後防又一片混亂，被伯明瀚城前峰頂入一粒，追成 1:1 ，諗住平手完半場，誰不知伯明瀚城另一個前峰一記 30 幾碼遠射，高飛曲墜，竟然正面笠死利記龍門，利記半場落後 1:2 ，下半場焗住搏命，攻門次數倍增，卒之靠一個問題 12 碼追成 2:2 平手，較後時間利記雖然攻到飛沙走石，卻未能多入一粒，最後 2:2 完場，痛失兩分！雖知道利記攻門廿幾三十次入兩球，但伯明瀚城攻門五次都係入兩球！？
一而再，接二連三嘅倒霉，真係無從解釋，只知道利記負能量急增，每日四周不停報道球員受傷，領隊下台，班主賣盤…
身為利記球迷，相信每個都感受到走在低谷嘅壓力，頭頭碰着黑嘅滋味的確唔好受，但要成為強隊，甚至冠軍，必須擁有緊握拳頭嘅自信心，堅信每人多走一步，力拼到底，總會有日
走出低谷，重回勝軌，何況艱難路上總有利記會歌同行…
YOU'LL NEVER WALK ALONE!
 現在或會感到獨力難支… 過了不久，飛快有型嘅王子又會再現，不停入波！Goal......November 09 天使與魔鬼上市一段時間嘅天使與魔鬼蛋糕，一個黑一個白，正邪分明，今晚趁住朋友生日，試試個白天使…
個蛋糕白雪雪，卻原來可以買支朱古力筆，喺蛋糕上面唧吓畫吓，寫上獨一無二嘅祝賀說話，幾好玩架！
天使只係陪襯，最重要嘅，當然係好朋友生日快樂，孖B聽話又乖乖，大家身體更健康。 November 03 外星生物空降碼頭今日寫字樓忽然嘈萱巴閉，原來樓下停車場有人發現奇怪生物， 大家唔知佢係乜水，你一言我一句，好不熱鬧。
起初，有人睇完，衝上嚟就話：「嘩！好鬼核突，毛臣臣咁…」
我不以為然，努力做嘢。
之後又有人邊行邊叫：「依！都唔知乜嘢嚟嘅，好似怪獸咁！」
我強作鎮定，堅持唔八卦，繼續做。
跟住又有同事睇完，邊行邊話：「鼠唔似鼠，蛇唔似蛇，雀唔似雀，好恐怖呀！」
鼠唔似鼠，蛇唔似蛇，雀唔似雀！？
我再忍唔住，攞起部相機衝落去停車場，誓要睇吓呢隻到底係乜嘢外星生物，人見人怕咁勁…
我去到現場，見到有個紙皮盒反轉，旁邊有幾條友喺度議論紛紛…
我哋行埋去，開著相機，心跳加速掌心冒汗，深吸一口氣：「開嚟見我！」
盒一攞開，噢！到底係乜嘢嚟架？
  雖然唔知佢叫乜名，但觀其形體，都係一隻雀啫，什麼「鼠唔似鼠，蛇唔似蛇，雀唔似雀」，真係吹到啤一聲。
October 30 電話查詢系統今朝要打電話去某銀行某分行，問啲濕碎嘢，於是先打 1083 ，原來依家變咗真人對話，好快就問到電話號碼…
跟手照住號碼打去嗰間銀行嗰間分行，電話一通，開始進入電話查詢服務…
廣東話按 1 ，英文按 2 ，普通話按 3 ，揀完之後，咩咩查詢按 1 ，咩咩查詢按 2 ，咩咩查詢就按 3 …
一大堆選擇，細分到令人咋舌，由 1 到 9 都唔夠仲要加埋「*」，聽完一大輪，就係無得揀「聯絡服務員」…
呢個時候，已經忘記晒之前按 1 係乜，按 2 係乜，於是又從頭聽一次，今次聽嘅過程要作決定喇，留心啲，揀個服務最近似嘅，按啦！
誰不知，跟手又係一大堆選擇，又 1 至 9 ，我又要揀，又連按幾個數字，轉轉接接，遊咗半個大花園，最後去到聽音樂…
感覺話我知，應該去到終點，問到要問嘅人…
電話接通咗，去到真人對話，我鬆口氣，問要問嘅問題，佢話：「依，你應該直接問分行，我哋係銷售架，不如你等等，我幫你接去分行！」
我都未答，音樂又響起，老老實實，啲音樂真係難聽到死，好似不停南無南無南無，催眠我快啲收線！
聽足幾分鐘，先接到去另一個男仔，我又問一次，佢話：「唔好意思，呢間分行雖然同區，但唔係你問嗰間噃！不如我俾另一個電話號碼，你打去問啦！」
我即時火都嚟埋，聲線高幾度，怒吼：「喂，我等咗幾個字，聽咗好耐你哋啲死鬼音樂，你咪再掟嚟掟去…」
男仔愕然：「得得得，你打呢個電話號碼，通咗之後按 1，0，1，就會有專責同事幫你架啦！」
收線之後我即時打電話，接通之後跟住按 1，0，1，（數字代表：中文，優先理財服務，預訂外幣現鈔）
呢次果然問到負責嘅人，佢亦即時答到我問題，終於脫苦海。
但其實我嘅問題係，馬拉松嘅贈品有得攞未？ That's all.
你話係咪風馬牛，係咪人都癲！ October 29 做咗唔覺，唔做就好覺！呢句說話係朋友早幾日分享做家務時嘅感受，當時我哈哈大笑，覺得好鬼貼切…
但諗深一層，除咗家務，仲有無其他嘢可以套用呢句說話呢？
例如…
~氹女朋友或老婆，氹咗佢唔覺，無氹你就大獲
~幫老公執手尾， 執咗佢唔覺，但唔執佢又唔學
~朝早杯咖啡 / 奶茶，飲咗未必覺，唔飲就乏力拼搏
~食麵落 XO 醬 / 辣椒醬，落咗唔覺，無落好似遺失味覺
~瞓覺張冷氣披，冚咗唔覺，唔冚好似蝸牛脫殼
哈哈…留意吓日常生活，或者會繼續發現，原來有唔少事情都係咁奇怪架。 October 23 阿鬼溝可樂今晚去九龍城聽講座，途經旺角， 肚餓到咕咕聲，於是買兩條油炸鬼，加罐可樂…
油炸鬼叫阿姐揀兩條特脆嘅，可樂就揀罐特別凍嘅，噢！一攞上手，口水分泌已經失控，決定邊行邊食邊享受…
咬一淡油炸鬼，外脆內暖，滿口油香，飲一淡可樂，漱漱口，咀入面支支渣渣得好似用洗潔精洗碗，無晒油膩感，清新晒，又咬一淡油炸鬼…
於是，左一口，右一口，和味到好想跳吓跳吓，活潑到不得了…
廿分鐘路程，轉眼就歎完，一到步，滿足到…「urt」一聲！
 你睇佢哋，真係天生一對自我陶醉架！ October 21 蚊滋今日公司搞佈置，响寫字樓天花板掛起四條泥黃色嘅帶，但呢啲唔係佈置嘅彩帶，而係專捉烏蠅蚊滋嘅「烏蠅紙」！
事源最近寫字樓好多細細隻嘅蚊滋仔四圍飛，佢哋身子細細但胆大唔怕死，專向住我哋嘅咀呀、鼻窿、耳窿甚至眼衝埋去，大家被呢啲神瘋敢死隊煩到無晒符，成日左撥右拍，燥狂到不得了…
卒之，今日巢番呢啲封塵以久嘅「烏蠅紙」，一掛出嚟，即時黐住兩隻，大家眼金金望住垂死嘅蚊滋，忽然有種解脫嘅喜悅，不自覺陰陰咀嘿嘿笑，心裡齊聲歡呼「你都有今日啦！」
October 12 凝冰可樂上市幾個月，都唔算新產品，今晚喺沙田見到部汽水機，兩公婆互望一眼，決定試一試…
拍咭一嘟，十蚊雞，彭，彎低腰攞出嚟，都係普通膠樽可樂，又唔係零舍凍啲，無乜特別吖…
我望兩望，決定就地正法，一扭開樽蓋，卜一聲，再沙一聲…
快快倒兩口，真係有啲嘢噃，但唔似冰，似啫哩多啲。
俾老婆試吓，佢尾兩尾，「麻麻哋，凍得滯！」
我皺皺眉…心諗「唔凍點有冰？」
返到屋企，老婆忽然話，呢啲變冰可樂，我都識整！
我都知，攞支可樂，放入冰箱吖嘛！ October 08 青島之旅 9/27 ~ 9/30 ( II )繼續青島之旅
第三日，9/29，正式自助旅遊
1. 再食酒店早餐，Keith 示範落蜜糖歎咖啡，果然好味！
2. 參觀著名‘迎賓館’，原本諗住到此一遊，影幾張算數，誰不知有意外發現…
 買票都未知館內有驚喜…首先，‘迎賓館’其實係當年德國總督官邸，建築內外都特色處處，外圍有好多好靚嘅大樹，空氣好清新，令遊人行起上嚟都高幾吋…
  話晒總督官邸，古樹都種得靚 外觀幾有性格… 老婆行過都忍唔住要敬禮…沙律！入到館入面，一樣睇到嘩嘩聲，無論牆壁火爐、寶石吊燈、古典鋼琴、書櫃桶…
 每間房都有嘅火爐，全部靠牆而建，個個都唔同 係流聲機，唔係流星鎚… 館內擾擺放好幾個古董鋼琴，Keith 都要現現身！ 毛澤東用過嘅書，大家卻對旋轉櫃桶最感興趣  都低係咪寶石吊燈呢？2a. 驚喜大發現，‘迎賓館’後面新建成嘅特色酒店，以紅堡、綠堡、藍堡為名，環境清優，渡假一流，無論酒店房間，園林花草，甚至閱讀室同餐廳，令大家樂而忘返，好想住番兩晚！
 記住‘迎賓館’後方，另有新天地 酒店閱讀室，最啱消磨時間 閱讀室一角，睇睇吓書釣魚嘅好地方 參觀單棟式套房，偏廳竟然又有鋼琴，Keith 終於忍唔住，要露兩手啦！登登登登… 浸浴的地方，想象一下，夕陽底下，一邊浸浴，一邊聽音樂，—邊飲冰凍啤酒，歎世界莫過於此！ 酒店四周環境清優，舒服到唔想走  盡情地 hea 吧！2b. 無意中發現，原來酒店嘅餐廳係另一驚喜，我哋揀咗食火鍋，味道極有水準，推介必食有蝦滑（即墨魚滑嘅親戚）、肥牛、仲有自家制醬油…
 全場得我哋一枱，幾嘈都得啦！  殺呀！衝呀衝快搶攻，食呀食食蝦吧！ 滿分推介‘蝦滑’，又鮮又彈牙，小心上癮！  神奇失控椅，團友一坐入去就會失常，流露癲喪一面！（部份相片不便刊登）3. 散步往‘基督教堂’，由‘迎賓館’沿斜路行去只需十分鐘，教堂已有一百年歷史，一紅一藍嘅樓頂好易認，依家仍然會舉行崇拜，所以有種新舊合一嘅感覺，牆壁地磚古式古香，掛牆卻有一排現代喇叭…
  休息前趕到   教堂內  上鐘樓，梯級好高呢！ 鐘樓上擺放一枚百年歷史嘅機芯，保養得好好，令大鐘至今仍然運作正常 大家一至對齒輪精密嘅運作感到讚嘆，當然，回頭影相嘅時間都好一至！ 鐘樓外觀4. 吉之島，連續參觀完兩座青島地標，趁住中午空檔，一於去‘吉之島’掃吓手信
 我最感興趣嘅大桶裝啤酒，每個 5L，桶身好鬼靚，可惜好難帶返香港！5. 晚飯食韓國燒烤，青島有好多韓國人居住，所以韓國菜一樣出名，今晚仲有新朋友加入，一齊開心食餐飯…
 韓國燒烤嘅特色，碗碟海！ 可愛又表情多多嘅小女孩，引得大家爭住同佢影相，魅力沒法擋，佢嘅名叫臨臨   6. 沿海旁散步返酒店，青島一大特色，就係沿海岸線嘅長廊又長又闊，我哋食到肚滿腸肥，決定行吓幫助消化，散步經過‘雕塑藝術區’、‘音樂廣場’、‘五四廣場’‘奧帆會場’，一個多小時就行到返酒店，浪漫又健康。
 喺‘音樂廣場’旁邊嘅灘檔，幾熱鬧架！ 兩位女仕揀緊小飾物，丈夫勿近！7. 最後一晚先發覺，我哋原來仲未去酒吧街，於是決定夜浦一晚，喺酒店附近揾到間美式酒吧，名叫‘傑克酒吧’，旅遊書都有介紹，都幾出名，當晚人唔多，點住蠟燭聽吓音樂，飲杯 long island ，傾計到深夜先返酒店！
第四日，9/30，拜拜青島
1. 先食酒店早餐
 早餐地方都好靚架 多得阿 Keith ，個個攞蜜糖沖咖啡2. 仲有半日，決定玩盡佢，於是包咗兩加的士，衝上青島另一地標‘訊號山’，故名思義，‘訊號山’係當年打仗用作發訊號嘅地方，所以四周都有唔同旗號嘅解釋，唔同組合有唔同意思。另外，亦因為要清楚發出訊號，所以位處較高位置，身處境樓之內，可讓人全方位欣賞青島四面嘅景觀，好正！
 同May May 一見如故嘅女的士司機  到達‘訊號山’  支支旗都有唔同意思 因為國慶，有免費晒相服務，將相配落訊號山門票，工作人員手法超快呢 完成品  紅菇景樓內有乾坤，就係自動旋轉觀景裝置，但凳仔要自己攞  美景醉人3. 最後一站，亦係必經之地，就係機場喇，辦好手續，揾間肯德雞大刷一餐，試吓香港無嘅食物，例如炸蝦球同牛肉薄餅…
 食埋舊雞，四日三夜，青島之旅圓滿結束，好玩到飛起！ October 05 青島之旅 9/27 ~ 9/30 ( I )行程撮要：
第一日，9/27，下午抵達青島…
 開始青島之旅…1. 逛咖啡街，歎 high tea，位于漳州路一帶，咖啡店林立，各適其適，我哋揀咗間新開張，有 7 折，但無嘢食！
 優皮歎啡最重要一環，梳化是也！2. 經過‘Backer Meister’，試食天然穀物所制嘅麵包，大大間鋪得我哋幾條友，只食幾個麵包仔，好明顯，留肚食晚飯。
 老婆最愛麵包店3. 晚飯去‘莊媽媽’食龍蝦，麻辣龍蝦仔一味得個頭大，蝦肉唔多，但味夠燶，特色之處係各人要掛上肚兜而食，開餐嘅時候，六個紅孩兒攞起杯青島啤，大喝一聲「飲杯」，爽呀！
 莊媽媽，食龍蝦… 其實係龍蝦仔！4. 飯後散散步，路經便利店，即試嶗山可樂，同是紅色罐，但加咗中藥成份，入口一刻…唔！實在…好怪！
 嶗山可樂，有益又健康！ 嶗山可樂，最啱送禮，但自己唔好飲！5. 逛‘書城’，大家都係文人雅士，樂而忘返，留到關門一刻先肯走（實情係 8 點幾先去到，人哋 9 點關門大吉）
6. 最後一站係‘麥凱樂’購物城…個超市，讓大家買吓地道零食，啤酒蝦條碗麵…
* 壓軸表演，Keith & May 慘試難食餅，過程痛苦不過惹笑，食到四圍都係餅碎，慘過打針，苦過 dee dee！
 邊食邊吐，慘無人道 第二日，9/28
1. 先食酒店早餐，有中有西有熱有凍，任君選擇
* 參加當地團，導遊叫小龍，唔止識廣東話，仲識講吓爛 gag，搞吓氣氛…
2. 先遊小魚山， 居高臨下，飽覽青島獨特嘅歐陸建築，紅頂黃牆，綠樹密林。
 小魚山頂見盲妹s3. 遊青島地標‘棧橋’，Ｍay Ｍay 卻叫‘殘橋’，搞笑一下！440 米長嘅石橋，一邊有好多影相攤檔，即影即 print ，另一邊又有好多小販，賣吓貝殼飾物，橋嘅盡頭仲有人玩跳水，雖然同晶晶爭好遠，卻引到好多路人影相拍片，我同阿蕉就係其中路人甲乙。
 棧橋定殘橋？…都係橋啫！4. 遊八大關，乃是青島嘅渡假勝地（當地人內歛啲，唔叫渡假，叫療養），大樹建路旁，少人少車，空氣清新，果真係療養好地方，亦係準新人影婚紗相嘅好地方。
 療養好地方，八大關！ 5. 參觀青島啤酒廠，的確大開眼界，除咗生產線嘅進步，仲有神奇‘醉酒屋’，經過時，會頭暈轉向企唔穩，仿酒醉感覺好過癮，一出房門又立刻無事，突然醒晒，好神奇！
 青島啤酒廠  每日飲一支，都要飲成年！ 必玩醉酒屋6. 往嶗山，參觀‘太清宮’，感受全真派嘅修行之地，此處特別多蜘蛛，隻隻肥美，行過樹底時要特別小心！
 嶗山太清宮  入場費廿皮！ 千年古樹…7. 天黑漫遊‘五四廣場’，享受微涼海風，睇下當地人點樣放孔明燈
 美麗醉人的夜景 有咁遠飛咁遠，咪回頭望呀！8. 晚飯往著名食府‘洁神’，品嘗美味三寶，有鮑汁悔參、蒜蓉對蝦、豉汁蒸鮑魚…豪食一餐，的確唔簡單。
 鮑汁大海參，唔想同人分… 大對蝦… 拳頭咁大嘅鮑魚，問你死未？9. 飯後逛‘台東三路商業步行街’，十足女人街溝廟街，熱鬧得很，導遊自誇一來一回掃貨只用一百大元，大家記得講價！
 朋友教落，大陸，有麥記嘅地方，就係繁華嘅地方10. 最後節目，跟導遊去按腳，試吓一種名為‘超級火足’嘅足浴，非用一般清水浸腳，而係以一桶有黃薑成份嘅中藥，腳一浸，唔夠幾分鐘已經火燒一樣，辣到無倫，按完對腳乸足一晚，真係攞苦嚟辛。
September 22 又有發現！September 20 漫畫早前開始租漫畫睇，老婆一口氣追晒三十幾本頭文字 D 之後，忽然租番中古名著…
BOY 聖子到！
重溫多年前嘅經典，老婆睇嘅時候不知幾開心，成日頭 dup dup 膊震震，耐唔耐就嘿嘿笑，時不時就架架叫…
你記得嗎？日日野、清志郎、壘球棍、煎鍋、尖牙、噴火、陰陰笑、青筋、神經質…
加加埋埋，就係少年時嘅集體回憶！
 我嘅理想，件征服全世界！September 16 小風波最近一件芝麻咁小嘅事，竟然掀起公司一輪小風波…
源自一封無關痛癢嘅 email ，忽然你答我答，明講但暗插， bomb 一聲，爆發依貓戰爭！
我一直留意，亦心想公司已經人少少，個個自己人一樣，有乜唔妥咪四四六六拆掂佢，洗乜無啦啦煲大件事咁老土！
誰不知，呢個世界就係乜人都有，我看在眼裡，越睇越火滾，亦見識何謂一樣米養百樣人（甚至多重人格）…
神經人，唔知自己做緊乜，就係亂咁吼
吹水人，吹完一大輪，只得成頭霧水，無人知佢講乜
隱形人，完全袖手旁觀，四個大字，關人鬼事
有型人，敢問敢答，講嘢有文有路有重點
自己人，心照不宣，唔洗講咁多
小風波過後，邊個係老土怪，一清二楚！ September 14 颱風…巨爵11:00，一直橫行嘅「巨爵」終於抬起頭來，由原本沿香港下方西飛，改變方向，點點偏北，勢力範圍波及香港，天文台不得不正視，改掛三號風球！
中午飯後仲有狂風大雨，海上運輸（貨櫃船）將會好快停航，「巨爵」原來唔係病貓！
可惜，應該一如之前幾個先風嘅習性，「巨爵」又再夜闖港島，但朝早著草…
明天又是新的一天，新的開始，返工嘅返工，返學嘅返學。
 September 08 夢人生匆匆幾十年，食完痾完就係眠！
講開發夢，雖然唔係專家，都有啲經驗分享一下：
道聽途說：
1. 如果發夢有人死咗，傳聞話現實中對方有益，自己就有害！（具體點有益，點有害就無從知曉）
2. 最多人話，夢見六合彩中獎號碼，瞓醒記得抄底，然後跟住買！（但永無夢到開第幾期！）
3. 你想夢見某人，最好瞓之前集中精神諗住佢，可以夢裡相遇！（可惜我從未成功，多數夢見怪獸！）
自身經驗：
1. 夢境九成九都係夜晚，仲係黑白灰三隻色！
2. 細個發夢跳降傘，着地一刻，就係現實跌落床嘅時候！
3. 同上，夢見人有三急，就係賴尿嘅先兆！
4. 夢見打怪獸，每次都打輸，次次都要逃走，好辛苦！
5. 同上，夢見被鬼追，總係跑唔郁，好似泥牛入海，永無走甩，只能夠驚叫扎醒！
6. 夢見食嘢，一定越食越肚餓，醒嘅時候流晒口水！
科技雖然發達，慶幸仲未可以控制夢境，所以今晚夢見劉華酒井怪獸還是惡鬼，真係天曉得？
惟有今晚早啲瞓。 September 04 惡夢一日瞓晏覺發咗個惡夢，內容好具體又清楚，一醒趁記憶猶新即時筆錄落嚟。
話說我有把柄被毒犯知道，毒犯係我朋友，遊說只要完成一次簡單任務，件事就一點筆勾消。
我半推半就應承，任務要做毒品加工，將毒品藏入燒肉，再轉交其他人運走…
一晚，毒犯朋友揸車到我屋企，交底咗一大樽疑似白粉（個樽 size 有豬腳羌樽咁大，啲粉係綠色，好似元氣綠茶粉），另外又俾底一舊燒肉，大約三十蚊份量，未斬，吩咐要我加工之後，交俾指定運貨人，我問邊個係運貨人，佢話運貨人記號係兩公婆，會揸架靚車停喺你屋企門口…
我屋企有個後花園，開始時我假扮拜神，擺舊燒肉上枱，心情緊張，左望右望，手快快先用細膠袋裝起啲粉，摺好用膠紙封好，又張舊燒肉切成三分一，將包粉夾喺塊燒肉脆皮同肉之間，用隔油紙包好，呢個時候，屋企門口真係有架車停落嚟響鞍，我行埋去，見一架黑色靚房車，前面坐住對夫婦，男嘅問：「係咪有好嘢！」
暗號好明顯，我就張舊加料燒肉交過佢手，佢一接過就開車，絕塵而去…
就係咁，好順利完成第一舊，但我自知犯緊罪，作賊心虛又後悔，心裡交戰得好利害，好想收手，但唔做又點處置啲粉呢？於是，我匆匆走返去個祭台，心諗既然咁快咁順利搞掂第一次，不如快快手手做晒佢，咁咪神不知鬼不覺囉？
跟住我又攞個小膠袋出嚟裝粉，但切燒肉時發現所剩無幾，肯定唔夠夾晒成樽粉，我腦筋急轉，不停諗計…
呢個時候，我發現屋企四圍都有警察，有軍裝有便裝，其中一個女便衣係亞視大姐明，啲警察不停巡花園出面，令我嘅精神更為緊張…
無幾耐，大姐明扮晒嘢行入嚟，佢四圍望，問我做緊乜，我收埋樽粉，扮鎮定咁答「咪拜緊神囉」，佢即問「乜你唔係信耶穌架咩？」，我呆一呆，就話「你又知我信耶穌」，佢又呆一呆，就行開咗…
我覺得越嚟越唔對路，一定要快手搞掂，唔係實出事，說時遲那時快，屋企大門忽然打開，好多鬼仔鬼妹行出嚟，原來我屋企夜晚有 party，剛剛散場，咁多人迎面行過，點包毒粉呢？呢吓又打亂我嘅行動，惟有再次收埋樽粉，等機會再包過。
人群中我有個幾歲大嘅細佬，鬼仔，佢無啦啦話要佈置後花園，四圍貼海報但又揾唔到膠紙，於是攞咗祭台上個膠紙坐，唔覺意食咗啲毒粉，就係咁上腦 high 咗，語無倫次亂咁講嘢，我慌忙失措騰騰震，呢次大獲，搞到屋企人啦！
呢個時候大姐明帶成隊人衝入嚟，大叫全部咪郁舉高手！即時發現細佬神態異常，又好快巢到樽毒粉，呢刻人贓並獲，我無話可說，即時鎖孖葉，大姐明細聲喺我耳邊講，你大獲啦！呢度犯毒係重罪，你預咗下半世坐監啦！
我被雞皮紙袋笠頭，心裡後悔到極點，慚愧底頭，不停問自己點解咁蠢，明明有機會番轉頭，但一錯再錯，依家下半世要坐監，點算？點算？我仲有好多嘢未做架！
啱啱行出花園，鈴鈴鈴鈴鈴鈴…，現實中枕邊電話響起，令我濛瀧夢醒，回到現實。 September 01 捱過八月…經歷咗一個忙亂嘅八月，工作上面對兩次嚴峻嘅考驗，過程中壓力大又無支援，成日感到獨力難支，辛苦到嘔！
呢段日子又病咗兩次，縱然無得休養三五七日，起碼有個借口食完藥大覺瞓，快叉一吓。
癲狂日子剛過去，工作環境又回復平靜，大家再次偷得浮生，睇吓報紙雜誌，休養生息。
我都趁機整理一下，重拾節奏，精精神神再上路。 August 04 颱風…天鵝2009 年第二個 8 號波，風如其名，“天鵝”，無飲 red bull 都有一對翼，經過路線都左飛右傾，一時中到正香港，一時又擦身而過…
不過，“天鵝”同之前颱風“莫拉菲”一樣，都係夜間出沒，所以預料好似兩個禮拜前一樣，聽朝瞓醒又要如常換衫返工…
想通宵煲碟或者打麻雀，留番下次啦！
August 02 Street Frighter 20 週年畫集好朋友自東京歸來，成功幫我買到呢本渴望以久嘅畫集…
本書成吋厚，詳細收錄咁多年“街霸”嘅插圖、海報、人物設定、原稿同畫畫比賽得獎作品，經典又豐富…
我愛不擇手，決要慢慢欣賞，睇到阿龍、阿Ken、春麗、軍佬、印度佬、蘇聯佬、怪獸、本田咁多年嘅演變…心裡泛起啲音樂同畫面，仲有一大堆屈招連續招…
越睇手心越出汗…噢！好想回到童年時，夜晚一吹雞，個個袋住廿皮衝出荃灣挑機！
 July 24 日偏食 與 大暑日七月廿二日，百年一遇嘅日偏食係 8:15 - 9:25 向香港東方上空出現…
咁難得嘅盛事當然要八卦感受一，於是返到公司，就啱時間，揸架車去 canteen 食早餐，沿路發覺天色慢慢變暗，有啲似人手較暗啲燈…
抬高頭用肉眼嘗試望吓個太陽，快立幾眼乜都睇唔到，對眼仲痛到飛起…
後嚟同事教用藍色透明快佬隔住雙眼，就可以舒舒服服欣賞日食奇景，你都咪話，個太陽好似變成一個發光的月亮，真係好奇妙！
 隔離碼頭啲人用磁碟睇，效果一樣咁靚。七月廿三日，全年大暑，氣溫彷佛真係高幾度…
我懶型下晝落街跑步，跑兩跑已經垂晒手，沿途反眼伸晒脷，辛苦到不得了，更感受到燒賣喺蒸籠入面嘅心情，每吋皮膚都燒焦，出嘅汗都臭啲！
|
|
|
